एनएमएमएस परीक्षेत न. ह. रांका विद्यालयाचे घवघवीत यश!

श्रीरंग पिहुलचा जिल्ह्यात खुल्या संवर्गातून प्रथम क्रमांक; चार विद्यार्थ्यांनी मिळविले उल्लेखनीय यश

बोदवड | प्रतिनिधी : नोव्हेंबर २०२५ मध्ये घेण्यात आलेल्या राष्ट्रीय आर्थिक दुर्बल घटकातील विद्यार्थ्यांसाठीच्या शिष्यवृत्ती परीक्षेत (एनएमएमएस) न. ह. रांका हायस्कूल व कनिष्ठ महाविद्यालयातील विद्यार्थ्यांनी उल्लेखनीय कामगिरी करत विद्यालयाच्या शैक्षणिक गुणवत्तेची परंपरा कायम राखली आहे.

या परीक्षेत इयत्ता आठवीतील श्रीरंग सतीश पिहुल याने तब्बल १४९ गुण मिळवत जिल्ह्यात खुल्या संवर्गातून प्रथम क्रमांक पटकावला. त्याच्या या दैदिप्यमान यशामुळे विद्यालय परिसरात आनंदाचे वातावरण असून, श्रीरंगचे सर्व स्तरांतून कौतुक होत आहे.

अन्य विद्यार्थ्यांचीही उल्लेखनीय कामगिरी

याच परीक्षेत विद्यालयातील कनक विजय पाटील हिने ११३ गुण, प्रतीक्षा विठ्ठल सुशीर हिने ९० गुण, तर सोहम संदीप शेळके याने ८३ गुण मिळवत यश संपादन केले.

चारही विद्यार्थ्यांच्या या यशामुळे विद्यालयाच्या शैक्षणिक कामगिरीत आणखी एक मानाचा तुरा रोवला गेला आहे. विद्यार्थ्यांच्या गुणवत्तेला योग्य मार्गदर्शन आणि सातत्यपूर्ण सरावाची जोड मिळाल्याने हे यश शक्य झाल्याचे विद्यालयाकडून सांगण्यात आले.

संस्थेच्या वतीने गुणवंत विद्यार्थ्यांचे अभिनंदन

गुणवंत विद्यार्थ्यांचे संस्थेचे अध्यक्ष मिठूलाल अग्रवाल, उपाध्यक्ष अजय जैन, सचिव विकास कोटेचा, सन्माननीय संचालक मंडळ व सदस्य यांनी अभिनंदन केले.

तसेच विद्यालयाचे मुख्याध्यापक पी. एम. पाटील, उपमुख्याध्यापिका एम. एस. बडगुजर, उपप्राचार्य प्रा. पराग जोशी, पर्यवेक्षक एस. के. राणे व पी. बी. नरवाडे, शिक्षकवृंद आणि शिक्षकेतर कर्मचाऱ्यांनीही विद्यार्थ्यांच्या यशाचे कौतुक केले.

पुढील वाटचालीसाठी शुभेच्छा

एनएमएमएस परीक्षेतील या उल्लेखनीय यशाबद्दल विद्यार्थ्यांचे अभिनंदन करून त्यांच्या पुढील शैक्षणिक वाटचालीसाठी संस्थेच्या वतीने शुभेच्छा देण्यात आल्या. विद्यार्थ्यांनी भविष्यातही अशाच प्रकारे सातत्यपूर्ण मेहनत घेऊन विद्यालयाचे नाव उज्ज्वल करावे, अशी अपेक्षा व्यक्त करण्यात आली.