भंडाऱ्यात २१ ऑगस्ट रोजी रोजगार मेळावा; ३५० पदांसाठी तरुणांना सुवर्णसंधी

भंडाऱ्यात २१ ऑगस्ट रोजी रोजगार मेळावा; ३५० पदांसाठी तरुणांना सुवर्णसंधी

मुख्यमंत्री युवा कार्य प्रशिक्षण योजनेअंतर्गत आयोजन; १२वी ते पदव्युत्तर उमेदवारांना संधी, दरमहा ६ ते १० हजारांपर्यंत विद्यावेतन

भंडारा | प्रतिनिधी : महाराष्ट्र शासनाच्या जिल्हा कौशल्य विकास, रोजगार व उद्योजकता मार्गदर्शन केंद्र, भंडारा यांच्या वतीने ‘मुख्यमंत्री युवा कार्य प्रशिक्षण योजने’अंतर्गत पंडित दीनदयाळ उपाध्याय रोजगार मेळाव्याचे आयोजन करण्यात आले आहे. हा रोजगार मेळावा शुक्रवार, २१ ऑगस्ट २०२६ रोजी सकाळी ११ ते दुपारी ३ वाजेपर्यंत जिल्हा परिषद सभागृह, जिल्हा परिषद कार्यालय, भंडारा येथे होणार आहे.

या रोजगार मेळाव्यात विविध शासकीय कार्यालये, आस्थापना, शाळा व महाविद्यालयांमधील एकूण ३५० रिक्त पदांवर प्रशिक्षणार्थींची निवड केली जाणार आहे. त्यामुळे रोजगाराच्या शोधात असलेल्या युवक-युवतींसाठी ही महत्त्वाची संधी उपलब्ध झाली आहे.

कोणत्या आस्थापनांमध्ये किती पदे?

रोजगार मेळाव्यात जिल्हा परिषद भंडारा येथे २५० पदे, एमएसआरटीसी भंडारा येथे ६० पदे, ईएचव्ही विभाग भंडारा येथे १० पदे, नगर परिषद पवनी येथे २ पदे, नगर परिषद तुमसर येथे ६ पदे, तालुका कृषी अधिकारी कार्यालय भंडारा येथे २ पदे, तसेच विविध शाळा व महाविद्यालयांमधील शिक्षक व शिक्षकेतर पदांसाठी संधी उपलब्ध आहे.

१२वी ते पदव्युत्तर उमेदवारांना संधी

या प्रशिक्षणासाठी १२वी, डिप्लोमा, पदवी आणि पदव्युत्तर अशी विविध शैक्षणिक पात्रता असलेल्या उमेदवारांना सहभागी होता येणार आहे. शैक्षणिक पात्रतेनुसार प्रशिक्षणार्थींना दरमहा ६ हजार, ८ हजार ते १० हजार रुपयांपर्यंत विद्यावेतन दिले जाणार आहे. प्रशिक्षणाचा कालावधी ११ महिने राहणार आहे.

ऑनलाइन नोंदणी आवश्यक

रोजगार मेळाव्यात सहभागी होण्यासाठी इच्छुक प्रशिक्षणार्थींनी मुख्यमंत्री युवा कार्य प्रशिक्षण योजनेच्या पोर्टलवर ऑनलाइन नोंदणी करणे आवश्यक आहे. तसेच आयोजकांनी उपलब्ध करून दिलेल्या क्यूआर कोडद्वारे गुगल फॉर्म भरून नोंदणी करता येणार आहे.

मुलाखतीस येताना उमेदवारांनी पुढील कागदपत्रे सोबत आणावीत :

• आधार कार्ड
• अधिवास प्रमाणपत्र (डोमिसाईल)
• शैक्षणिक कागदपत्रे — १२वी प्रमाणपत्र, डिप्लोमा किंवा पदवी
• प्रशिक्षणार्थी नोंदणी (इंटर्न प्रोफाईल)ची प्रत

उमेदवारांनी मेळाव्यास स्वखर्चाने उपस्थित राहावे, असे आवाहन करण्यात आले आहे.

अधिक माहितीसाठी संपर्क

अधिक माहितीसाठी जिल्हा कौशल्य विकास, रोजगार व उद्योजकता मार्गदर्शन केंद्र, भंडारा कार्यालयाशी ०७१८४-२५२२५० या दूरध्वनी क्रमांकावर संपर्क साधावा. तसेच जिल्हा समन्वयक अतुल पडोले यांच्याशी संपर्क साधण्याचे आवाहन प्रशासनाने केले आहे.

रोजगाराच्या संधीच्या प्रतीक्षेत असलेल्या पात्र युवक-युवतींनी या मेळाव्याचा लाभ घ्यावा, असे प्रशासनाकडून आवाहन करण्यात आले आहे.