रशियन कंपनीत गुंतवणुकीचे आमिष; जळगावातील वकिलाची साडेसात लाखांची फसवणूक
युरो-डॉलर ट्रेडिंग व बिटकॉईनमधून ३६० टक्के परताव्याचे आमिष; पुण्यातील दोघांविरुद्ध सायबर पोलिसांत गुन्हा
जळगाव | प्रतिनिधी
रशियन कंपनीचे समभाग भारतात विक्रीस उपलब्ध झाल्याचा बनाव रचत तसेच युरो-डॉलर ट्रेडिंग आणि बिटकॉईनच्या माध्यमातून दरमहा तब्बल ३६० टक्क्यांपर्यंत परतावा मिळवून देण्याचे आमिष दाखवत जळगावातील एका ५७ वर्षीय वकिलाची ७ लाख ६० हजार रुपयांची आर्थिक फसवणूक केल्याचा प्रकार समोर आला आहे. याप्रकरणी पुण्यातील दोघांविरुद्ध जळगाव सायबर पोलीस ठाण्यात गुन्हा दाखल करण्यात आला आहे.
या प्रकरणी विसांजी नगरातील वकील विजय बाबुलाल दाणेज (वय ५७) यांनी पोलिसांत फिर्याद दिली आहे. त्यांच्या तक्रारीनुसार, संशयितांनी विविध कागदपत्रे, कथित जागतिक करारनामे, कंपनीच्या संचालकांची ओळखपत्रे तसेच वृत्तपत्रांमध्ये प्रसिद्ध झाल्याचे सांगितलेल्या बातम्यांचा आधार घेत त्यांचा विश्वास संपादन केला.
फिर्यादीत नमूद केल्यानुसार, ६ जून २०१६ ते २८ मार्च २०२० या कालावधीत संबंधित व्यवहार करण्यात आले. रशियन कंपनीचे शेअर्स, युरो-डॉलर ट्रेडिंग आणि बिटकॉईनमध्ये गुंतवणूक केल्यास मोठ्या प्रमाणात परतावा मिळेल, असे सांगून दाणेज यांना गुंतवणुकीस प्रवृत्त करण्यात आले.
खात्यावर दिसला आभासी नफा
संशयितांनी बिटकॉईन खरेदी आणि गुंतवणुकीच्या नावाखाली दाणेज यांच्याकडून ७ लाख १० हजार रुपये घेतल्याचे तक्रारीत नमूद करण्यात आले आहे. सुरुवातीला त्यांना ३७२ डॉलर कमिशन देण्यात आले. त्यानंतर संबंधित खात्यावर गुंतवणुकीतून मोठा नफा झाल्याचे आभासी स्वरूपात दाखविण्यात आले.
मात्र, प्रत्यक्षात खात्यावर दिसणारी रक्कम काढण्याचा प्रयत्न केल्यानंतर ती काढता येत नसल्याचे त्यांच्या लक्षात आले. त्यामुळे आपली फसवणूक झाल्याचा संशय बळावला. दाणेज यांनी गुंतवलेली रक्कम परत मागण्यास सुरुवात केली.
पैसे मागितल्यावर धमकीचा आरोप
रक्कम परत मागितल्यानंतर संशयितांकडून ‘एन्काऊंटर’ करण्याची धमकी देण्यात आल्याचा गंभीर आरोप तक्रारीत करण्यात आला आहे. त्यामुळे आर्थिक फसवणुकीसोबतच धमकीचा प्रकारही समोर आल्याने प्रकरणाचे गांभीर्य वाढले आहे.
या प्रकरणी पुणे येथील विनोद निमानाथ सोनार (रा. कात्रज, पुणे) आणि आनंद परदेशी यांच्याविरुद्ध जळगाव सायबर पोलीस ठाण्यात गुन्हा दाखल करण्यात आला आहे.
ऑनलाइन गुंतवणुकीतून कमी कालावधीत अवास्तव परतावा देण्याचे आमिष दाखवून नागरिकांची फसवणूक करण्याचे प्रकार वाढत असताना या घटनेने पुन्हा एकदा सावधगिरीचा इशारा दिला आहे. अनोळखी व्यक्ती किंवा संस्थेच्या माध्यमातून होणाऱ्या ऑनलाइन गुंतवणुकीपूर्वी संबंधित कंपनी आणि गुंतवणूक यंत्रणेची अधिकृत माहिती तपासणे आवश्यक असल्याचे पोलिसांकडून आवाहन करण्यात येत आहे.
या प्रकरणाचा पुढील तपास पोलीस निरीक्षक प्रदीप ठाकूर करीत आहेत. पोलिसांकडून आर्थिक व्यवहार, संबंधित खात्यांची माहिती तसेच संशयितांशी झालेल्या संपर्काची चौकशी केली जात आहे.
