तळेगाव दाभाडे : तळेगाव दाभाडे येथील मंत्रा सिटी ए विंग सोसायटीमध्ये झालेल्या बैठकीदरम्यान गावगुंडांनी घुसून सोसायटीच्या पदाधिकाऱ्यांवर लोखंडी रॉड व हाताने मारहाण केल्याची धक्कादायक घटना उघडकीस आली आहे. “आम्ही गाववाले आहोत… कॉन्ट्रॅक्ट बदलण्याची हिंमत करू नका,” अशी धमकी देत तसेच “जशी किशोर आवारे यांची हत्या केली, तशी तुमचीही विकेट पाडू,” अशी जीवे मारण्याची धमकी देण्यात आल्याने परिसरात भीतीचे वातावरण निर्माण झाले आहे. याप्रकरणी तळेगाव दाभाडे पोलीस ठाणे येथे सात जणांविरुद्ध गुन्हा दाखल करण्यात आला आहे.
फिर्यादी रेखा प्रदीप वाघ (रा. मंत्रा सिटी, तळेगाव दाभाडे) यांनी दिलेल्या तक्रारीनुसार विराज खळदे, भावेश खळदे, महेश खळदे, भूषण खळदे, सौरभ उर्फ शुभम खळदे, चिराग खळदे (सर्व रा. खळदे आळी, जिजामाता चौक, तळेगाव दाभाडे) तसेच मतिन (रा. मंत्रा सिटी) यांच्याविरोधात गुन्हा दाखल करण्यात आला आहे. मिळालेल्या माहितीनुसार, १५ मार्च रोजी सायंकाळी साडेसातच्या सुमारास सोसायटीची बैठक सुरू असताना रेखा वाघ या दोन वर्षांच्या लेजरबाबत माहिती देत होत्या. तसेच त्यांनी वेन्डर बदलण्याचा प्रस्ताव मांडला. यावेळी आरोपींनी बैठकीत गोंधळ घालत दमदाटी केली.
सचिव हेमंत संपकाळ यांनी आरोपींना शांत राहण्यास सांगितल्यावर आरोपींनी अचानक त्यांच्यावर लोखंडी रॉड व हाताने हल्ला केला. त्यांना वाचविण्यासाठी गेलेल्या अध्यक्ष शांताराम कोकाटे व रेखा वाघ यांनाही खुर्च्या व रॉडने मारहाण करण्यात आली. यानंतर तिघे जखमी अवस्थेत बाहेर पडत असताना आरोपींनी पुन्हा जीवे मारण्याची धमकी दिली. जखमींनी पोलीस ठाण्यात धाव घेतली असता त्यांना उपचारासाठी पाठविण्यात आले. उपचारानंतर तक्रार देण्यासाठी आले असता आरोपी पुन्हा पोलीस ठाण्यात येऊन फिर्यादी व त्यांच्या मुलीकडे खुनशी नजरेने पाहत अश्लील वर्तन केल्याचाही आरोप आहे.
या घटनेनंतर फिर्यादींनी आरोपींवर कठोर कारवाई करून तात्काळ अटक करावी तसेच स्वतःला पोलीस संरक्षण द्यावे, अशी मागणी केली आहे. अन्यथा राज्य महिला आयोग व न्यायालयाचा दरवाजा ठोठावणार असल्याचा इशाराही त्यांनी दिला आहे.
सदर घटनेमुळे तळेगाव दाभाडे परिसरात खळबळ उडाली असून पुढील तपास पोलीस करत आहेत.
