बेटावद येथे भव्य रक्तदान शिबिर; ८१ रक्तदात्यांचा उत्स्फूर्त सहभाग
जश्ने-ए-ईद मिलादुन्नबीचे औचित्य साधत मुस्लिम पंच कमिटीचा सामाजिक उपक्रम; हिंदू-मुस्लिम ऐक्याचेही घडले सुंदर दर्शन
बेटावद | प्रतिनिधी : सईद खान
जश्ने-ए-ईद मिलादुन्नबी या पवित्र सणाचे औचित्य साधून मुस्लिम पंच कमिटी, बेटावद यांच्या वतीने बुधवार, २६ ऑगस्ट रोजी भव्य रक्तदान शिबिराचे आयोजन करण्यात आले. मदरसा अशरफिया, मुस्लिम मोहल्ला परिसरात सकाळी १० ते दुपारी ४ या वेळेत झालेल्या या शिबिराला तरुणांसह नागरिकांचा उत्स्फूर्त प्रतिसाद मिळाला. या सामाजिक उपक्रमात एकूण ८१ रक्तदात्यांनी रक्तदान केले.
पैगंबर हजरत मोहम्मद साहेब यांच्या जयंतीनिमित्त सामाजिक बांधिलकी जपत मुस्लिम पंच कमिटीने या उपक्रमाचे आयोजन केले. रक्तदानाच्या माध्यमातून गरजू रुग्णांना मदत मिळावी आणि समाजात मानवतेचा संदेश पोहोचावा, हा या उपक्रमामागील उद्देश होता.
सहाय्यक पोलीस निरीक्षक सचिन कापडणीस यांच्या हस्ते उद्घाटन
रक्तदान शिबिराचे उद्घाटन नरडाणा पोलीस ठाण्याचे सहाय्यक पोलीस निरीक्षक सचिन कापडणीस यांच्या हस्ते करण्यात आले. यावेळी त्यांनी ईद-ए-मिलादुन्नबीसारख्या पवित्र सणाचे औचित्य साधून रक्तदानासारखा समाजोपयोगी उपक्रम राबविल्याबद्दल आयोजकांचे कौतुक केले.
‘रक्तदान हेच श्रेष्ठदान असून, एका व्यक्तीच्या रक्तदानामुळे गरजू रुग्णाचा जीव वाचण्यास मदत होऊ शकते,’ असे विचार यावेळी व्यक्त करण्यात आले.
८१ रक्तदात्यांचे रक्तदान
शिबिरात बेटावद व परिसरातील तरुण तसेच नागरिकांनी मोठ्या संख्येने सहभाग घेतला. एकूण ८१ रक्तदात्यांनी रक्तदान करून सामाजिक बांधिलकी जपली.
रक्तसंकलनाचे कार्य श्री छत्रपती शिवाजी महाराज बहुउद्देशीय संस्था, वरद रक्त केंद्र, धुळे यांच्या माध्यमातून गुणवंत देशमुख यांच्या मार्गदर्शनाखाली वैद्यकीय पथकाच्या सहकार्याने यशस्वीरीत्या पार पडले.
रक्तदानातून हिंदू-मुस्लिम ऐक्याचा संदेश
या शिबिराला हिंदू समाजातील बांधव आणि विविध क्षेत्रांतील मान्यवरांनीही आवर्जून भेट दिली. त्यांनी मुस्लिम बांधवांना ईदच्या शुभेच्छा देत रक्तदानासारख्या मानवतावादी उपक्रमाचे कौतुक केले. विविध समाजघटकांनी एकत्र येत सामाजिक कार्याला दिलेला हातभार हा बेटावदच्या सामाजिक एकतेचे आणि हिंदू-मुस्लिम ऐक्याचे सुंदर उदाहरण ठरला.
आयोजकांचे विशेष परिश्रम
रक्तदान शिबिर यशस्वी करण्यासाठी मुस्लिम पंच कमिटी आणि मुस्लिम समाज बांधवांनी विशेष परिश्रम घेतले. बेटावद व परिसरातील सर्वधर्मीय मान्यवरांनी शिबिराला भेट देऊन आयोजकांचे अभिनंदन केले. धार्मिक सणाला सामाजिक सेवेची जोड देत राबविलेल्या या उपक्रमाचे सर्वत्र कौतुक होत आहे.
