क्रीडा संस्कारातून उज्ज्वल भविष्याचा संदेश!
स्कूल ऑफ स्कॉलर्स, मलकापूरमध्ये राष्ट्रीय क्रीडा दिन उत्साहात; राष्ट्रीय खेळाडूंचा सन्मान, विद्यार्थ्यांचा उत्स्फूर्त सहभाग
मलकापूर, प्रतिनिधी | २९ ऑगस्ट २०२६
भारताचे महान हॉकीपटू मेजर ध्यानचंद यांच्या जयंतीनिमित्त स्कूल ऑफ स्कॉलर्स, मलकापूर येथे राष्ट्रीय क्रीडा दिन उत्साहपूर्ण वातावरणात साजरा करण्यात आला. क्रीडा संस्कार, शिस्त, संघभावना आणि निरोगी जीवनशैली यांचे महत्त्व विद्यार्थ्यांपर्यंत पोहोचविणाऱ्या या कार्यक्रमात विविध उपक्रमांसह राष्ट्रीय खेळाडूंचा गौरव करण्यात आला.
कार्यक्रमाला शाळेच्या प्राचार्या डॉ. सौ. सुदीप्ता सरकार, शैक्षणिक समन्वयक श्री. अविनाश ढाके, सांस्कृतिक विभाग प्रमुख श्री. शशांक चौहान, सौ. पल्लवी अहिर, प्री-प्रायमरी विभाग प्रमुख सौ. सुजाता पाटील, सौ. रूपाली पाटील, प्रार्थना प्रमुख श्री. गणेश तायडे, श्री. नितीन तायडे तसेच लेखा विभाग प्रमुख श्री. आकाश खोडके यांची प्रमुख उपस्थिती होती.
कार्यक्रमाच्या प्रारंभी मान्यवरांच्या हस्ते विद्येची आराध्य देवता माता सरस्वतीचे पूजन करण्यात आले. त्यानंतर मेजर ध्यानचंद यांच्या प्रतिमेला पुष्पहार अर्पण करून अभिवादन करण्यात आले. स्टुडंट कौन्सिलच्या विद्यार्थ्यांनी उपस्थित मान्यवरांचे स्वागत केले.
खेळ विद्यार्थ्यांच्या सर्वांगीण विकासाचा पाया
प्राचार्या डॉ. सौ. सुदीप्ता सरकार यांनी मेजर ध्यानचंद यांच्या जीवनकार्याची माहिती देताना विद्यार्थ्यांच्या जीवनातील खेळाचे महत्त्व अधोरेखित केले. क्रीडा विभाग प्रमुख स्वप्निल साळुंके यांनी खेळामुळे विद्यार्थ्यांच्या व्यक्तिमत्त्वात होणारे सकारात्मक बदल तसेच उत्कृष्ट खेळाडू घडविण्यासाठी पालकांचे सहकार्य किती महत्त्वाचे आहे, याबाबत मार्गदर्शन केले.
शाळेचे संचालक ॲड. श्री. अमरकुमारजी संचेती यांनी क्रीडा विभागाला राष्ट्रीय क्रीडा दिनाच्या शुभेच्छा दिल्या. क्रीडा विभागाच्या शिक्षिका साक्षी धारस्कर यांनी खेळाडू व प्रशिक्षक यांचे जीवनातील महत्त्व स्पष्ट करत विद्यार्थ्यांना मार्गदर्शन केले.
तीन भाषांतून मेजर ध्यानचंद यांच्या कार्याला उजाळा
कार्यक्रमात इयत्ता आठवीची विद्यार्थिनी कु. शनाया पारख हिने इंग्रजी भाषेत मेजर ध्यानचंद यांच्या जीवनकार्याची माहिती दिली. कु. स्वरा देशमुख हिने मराठीतून त्यांच्या क्रीडा क्षेत्रातील योगदानाचे महत्त्व विशद केले, तर कु. अनया पारख हिने हिंदी भाषेत त्यांच्या प्रेरणादायी जीवनप्रवासाची माहिती दिली.
राष्ट्रीय खेळाडूंचा गौरव
दिल्ली येथे झालेल्या SGFIच्या ६९व्या स्कूल नॅशनल बेसबॉल क्रीडा स्पर्धेत सहभागी झालेली शाळेची राष्ट्रीय खेळाडू कु. लावण्या ज्ञानेश्वर बडगुजर तसेच ओडिशा येथे झालेल्या राष्ट्रीय सॉफ्ट टेनिस क्रीडा स्पर्धेत सहभागी झालेली कु. आरोही देविदास दरेगावे या दोन्ही राष्ट्रीय खेळाडूंचा प्राचार्या डॉ. सौ. सुदीप्ता सरकार यांच्या हस्ते ट्रॉफी व पुष्पगुच्छ देऊन सत्कार करण्यात आला.
यानंतर राष्ट्रीय खेळाडू कु. लावण्या बडगुजर हिच्या हस्ते उपस्थित खेळाडूंना क्रीडा स्पर्धेची शपथ देण्यात आली.
विविध क्रीडा स्पर्धांना विद्यार्थ्यांचा उत्स्फूर्त प्रतिसाद
राष्ट्रीय क्रीडा दिनानिमित्त शाळेत विविध क्रीडा स्पर्धांचे आयोजन करण्यात आले होते. विद्यार्थ्यांनी या स्पर्धांमध्ये उत्स्फूर्त सहभाग नोंदवत क्रीडाप्रती आपली आवड व्यक्त केली. या उपक्रमातून विद्यार्थ्यांमध्ये शिस्त, संघभावना, आत्मविश्वास आणि निरोगी जीवनशैलीची प्रेरणा निर्माण झाली.
कार्यक्रमाचे प्रारंभीचे प्रभावी सूत्रसंचालन क्रीडा विभाग प्रमुख स्वप्निल साळुंके यांनी केले. त्यानंतर इयत्ता नववीच्या विद्यार्थिनी कु. कृतिका पहाडे व कु. रिया पाटील यांनी उत्कृष्ट सूत्रसंचालन केले. क्रीडा शिक्षक मनीष उमाळे यांनी आभार प्रदर्शन केले.
कार्यक्रमाच्या यशस्वी आयोजनासाठी क्रीडा विभाग प्रमुख स्वप्निल साळुंके, क्रीडा शिक्षक मनीष उमाळे, क्रीडा शिक्षिका साक्षी धारस्कर तसेच शाळेतील सर्व शिक्षक-शिक्षिका व कर्मचारी यांनी मोलाचे सहकार्य केले. संपूर्ण कार्यक्रम उत्साहपूर्ण वातावरणात संपन्न झाला.
