सावदा पोलिसांची गोवंश मांस विक्रीविरोधात धडक कारवाई

सावदा पोलिसांची गोवंश मांस विक्रीविरोधात धडक कारवाई

८५ किलो मांसासह २१ हजार ९०० रुपयांचा मुद्देमाल जप्त; एकाला अटक, एक आरोपी फरार

सावदा प्रतिनिधी : अक्षय वाघ | दिनांक : २८ सप्टेंबर २०२६

सावदा पोलिसांनी रावेर तालुक्यातील लोहारा येथील गुल्ली लोहारा परिसरात बेकायदेशीररीत्या गोवंश जातीच्या जनावराचे मांस बाळगून विक्री केल्याच्या संशयावरून कारवाई केली. या कारवाईत पोलिसांनी ८५ किलो मांस, वजन काटा, सुरा, कुऱ्हाड आणि रोख रक्कम असा एकूण २१ हजार ९०० रुपयांचा मुद्देमाल जप्त केला असून एका संशयिताला ताब्यात घेण्यात आले आहे. तर अन्य एक आरोपी पसार झाल्याची माहिती पोलिसांनी दिली.

सावदा पोलीस ठाण्याचे पोलीस हेड कॉन्स्टेबल मेहरबान तडवी यांच्या फिर्यादीवरून याप्रकरणी गुन्हा दाखल करण्यात आला आहे.

गुप्त माहितीवरून छापा

पोलिसांच्या माहितीनुसार, २८ सप्टेंबर रोजी सकाळी सुमारे ६.२९ वाजता सावदा पोलीस ठाण्याचे पोलीस उपनिरीक्षक राहुल सानप, सहायक पोलीस निरीक्षक गणेश फड आणि सहकाऱ्यांना लोहारा गावातील गुल्ली लोहारा भागात सुकी नदीकाठच्या एका घराच्या आडोशाला गोवंश मांस बाळगून त्याची विक्री होत असल्याची माहिती मिळाली.

माहितीच्या आधारे पोलीस पथकाने पंचांसह सकाळी सुमारे ६.५५ वाजता घटनास्थळी छापा टाकला. पोलिसांची चाहूल लागताच संशयितांनी पळून जाण्याचा प्रयत्न केल्याचे पोलिसांनी सांगितले. त्यापैकी एका संशयिताचा पाठलाग करून त्याला ताब्यात घेण्यात आले, तर दुसरा संशयित झाडाझुडपांचा फायदा घेत पसार झाला.

एकाला अटक; दुसरा फरार

पोलिसांनी दिलेल्या माहितीनुसार ताब्यात घेण्यात आलेल्या आरोपीचे नाव सलीमखा महेमुदखा कुरेशी (वय ६६, रा. कसाईवाडा, रसलपूर, ता. रावेर) असे आहे. तर अकीलखा सलीमखा कुरेशी (रा. रसलपूर, ता. रावेर) हा आरोपी फरार आहे. घटनास्थळाच्या मालकीसंदर्भात असलम शहादुर तडवी (रा. गुल्ली लोहारा, ता. रावेर) याचे नावही पोलिसांनी नमूद केले आहे.

२१ हजार ९०० रुपयांचा मुद्देमाल जप्त

कारवाईदरम्यान पोलिसांनी खालील मुद्देमाल जप्त केल्याचे सांगितले आहे—

• ८५ किलो गोवंश जातीचे मांस – अंदाजे किंमत ₹१७,०००

• सुपर क्वालिटी वजन काटा – ₹३,०००

• लोखंडी सुरा – ₹५००

• लोखंडी कुऱ्हाड – ₹५००

• रोख रक्कम – ₹९००

अशाप्रकारे एकूण ₹२१,९०० किमतीचा मुद्देमाल जप्त करण्यात आला आहे.

विविध कलमांन्वये गुन्हा दाखल

याप्रकरणी सावदा पोलीस ठाण्यात FIR क्रमांक ०२४२/२०२६ अन्वये गुन्हा दाखल करण्यात आला आहे. पोलिसांच्या माहितीनुसार, महाराष्ट्र पशु संरक्षण अधिनियम, १९७६ (सुधारित २०१५) मधील कलम ५(ब), ५(क), ९, ९(अ) तसेच भारतीय न्याय संहिता (BNS), २०२३ मधील कलम २७१, ३(५) आणि महाराष्ट्र पोलीस अधिनियम, १९५१ मधील कलम १०५, ११७ अन्वये कारवाई करण्यात आली आहे.

घटनास्थळावरून जप्त केलेल्या मांसाचे नमुने तपासणीसाठी सीलबंद करण्यात आले असून, पुढील तपास पोलीस हेड कॉन्स्टेबल अतुल तडवी करीत आहेत.

दरम्यान, अटक करण्यात आलेल्या सलीमखा महेमुदखा कुरेशी याला न्यायालयासमोर हजर केले असता न्यायालयाने एक दिवसाची पोलीस कोठडी सुनावल्याची माहिती पोलिसांनी दिली.

वरिष्ठांच्या मार्गदर्शनाखाली कारवाई

ही कारवाई पोलीस अधीक्षक श्रीकांत धीवरे, अपर पोलीस अधीक्षक संदीप गावित आणि उपविभागीय पोलीस अधिकारी नंदराज पाटील यांच्या मार्गदर्शनाखाली सहायक पोलीस निरीक्षक गणेश फड, पोलीस उपनिरीक्षक राहुल सानप, श्रेणी पोलीस उपनिरीक्षक जयराम खोडपे, पोलीस हेड कॉन्स्टेबल मेहरबान तडवी, अतुल तडवी, निलेश बाविस्कर तसेच चालक पोलीस कॉन्स्टेबल विकास जोशी यांनी केली.