खडकला बुद्रुकच्या शेतकऱ्यांना वनहक्क पट्टे द्या; दुष्काळी पंचनाम्यांची मागणी

धडगाव तहसीलदारांना ग्रामस्थांचे निवेदन; पाणीटंचाई, घाटरस्त्याच्या दुरवस्थेचा प्रश्नही उपस्थित, १५ दिवसांत कार्यवाही न झाल्यास आंदोलनाचा इशारा

धडगाव | प्रतिनिधी

नंदुरबार जिल्ह्यातील धडगाव तालुक्यातील खडकला बुद्रुक येथील शेतकऱ्यांचे प्रलंबित वनहक्क दावे तातडीने निकाली काढून पात्र शेतकऱ्यांना वनहक्क पट्टे द्यावेत, तसेच दुष्काळी परिस्थितीमुळे झालेल्या शेतीच्या नुकसानीचे पंचनामे करून नियमानुसार नुकसानभरपाई द्यावी, अशी मागणी ग्रामस्थांनी केली आहे. यासंदर्भात शेतकरी व ग्रामस्थांनी धडगावच्या तहसीलदारांना निवेदन दिले. गावातील विविध प्रलंबित समस्या सोडविण्यासाठी १५ दिवसांची मुदत देण्यात आली असून, त्यानंतरही कार्यवाही न झाल्यास लोकशाही मार्गाने आंदोलन करण्याचा इशारा देण्यात आला आहे.

अनेक वर्षांपासून वनहक्क दावे प्रलंबित

खडकला बुद्रुक येथील शेतकरी अनेक पिढ्यांपासून जमिनी कसत असून, शेती हाच त्यांच्या उदरनिर्वाहाचा प्रमुख आधार आहे. मात्र, अनेक वर्षांपूर्वी वनहक्क दावे दाखल करूनही अद्याप गावातील एकाही शेतकऱ्याला वनहक्क पट्टा मिळालेला नसल्याचे ग्रामस्थांनी निवेदनात नमूद केले आहे. जुन्या सातबारा उताऱ्यांसह सन १९८६ च्या आदेशासारखे विविध पुरावे उपलब्ध असल्याचेही त्यांनी म्हटले आहे.

वनहक्क दावे प्रलंबित राहिल्यामुळे शेतकऱ्यांना विविध शासकीय योजनांचा लाभ घेताना अडचणी येत असल्याची तक्रार ग्रामस्थांनी केली. त्यामुळे उपलब्ध कागदपत्रांची पडताळणी करून पात्र शेतकऱ्यांचे वनहक्क दावे तातडीने निकाली काढावेत, अशी मागणी करण्यात आली आहे.

वनपट्टे नसल्याने पंचनामे टाळू नका

गावात दुष्काळी परिस्थिती असतानाही शेतकऱ्यांच्या पिकांच्या नुकसानीचे पंचनामे झाले नसल्याचे ग्रामस्थांचे म्हणणे आहे. वनहक्क पट्टे मिळाले नसल्याचे कारण देऊन पंचनामे टाळण्यात येऊ नयेत. संबंधित कागदपत्रांची पडताळणी करून पात्र शेतकऱ्यांच्या नुकसानीची नोंद घ्यावी आणि नियमानुसार नुकसानभरपाई द्यावी, अशी मागणी निवेदनातून करण्यात आली आहे.

वनपट्ट्यांअभावी पीकविमा, विहिरी आणि इतर शासकीय योजनांचा लाभ मिळवताना अडचणी येत असल्याचेही ग्रामस्थांनी निदर्शनास आणून दिले. प्रशासनाच्या दिरंगाईचा फटका शेतकऱ्यांना बसू नये आणि पात्र लाभार्थ्यांना योजनांचा लाभ मिळावा, अशी अपेक्षा त्यांनी व्यक्त केली.

पाणीटंचाई आणि घाटरस्त्याच्या दुरवस्थेचा प्रश्न

वनहक्क पट्टे आणि दुष्काळी पंचनाम्यांबरोबरच गावातील पिण्याच्या पाण्याची तीव्र टंचाई दूर करण्यासाठी जलजीवन मिशनअंतर्गत सुरू असलेली कामे तातडीने पूर्ण करावीत, अशी मागणी करण्यात आली आहे. तसेच खडकला बुद्रुक घाट रस्त्याची दुरवस्था लक्षात घेऊन रस्त्याची तातडीने दुरुस्ती करावी, अशी मागणीही ग्रामस्थांनी केली.

‘१५ दिवसांत कार्यवाही करा’

“गावातील शेतकऱ्यांनी अनेक वर्षांपूर्वी वनहक्क दावे दाखल केले आहेत. मात्र, अद्याप हे दावे निकाली निघालेले नाहीत. वनपट्टे नसल्यामुळे पीकविमा, विहिरींसह विविध शासकीय योजनांचा लाभ घेताना अडचणी येत आहेत. वनहक्क दावे वेळेत निकाली काढणे ही संबंधित विभागाची जबाबदारी आहे. प्रशासनाच्या दिरंगाईची शिक्षा शेतकऱ्यांना का भोगावी लागावी? उपलब्ध शेतीविषयक पुराव्यांची पडताळणी करून पात्र शेतकऱ्यांना योजनांचा लाभ द्यावा, दुष्काळी पंचनामे करावेत आणि गावातील इतर समस्या तातडीने सोडवाव्यात,” अशी मागणी ग्रामस्थ दिलीप पावरा यांनी केली.

ग्रामस्थांच्या मागण्यांवर पुढील १५ दिवसांत संबंधित प्रशासनाने गांभीर्याने दखल घेऊन ठोस कार्यवाही करावी. अन्यथा लोकशाही मार्गाने आंदोलन छेडण्यात येईल, असा इशारा निवेदनातून देण्यात आला आहे.

यावेळी दिलीप पावरा, तेरसिंग पावरा, विक्रम पटले, रामदास पावरा, रमेश पटले, गोविंद पावरा, किशोर पावरा, रावजी पटले, सुनील पावरा आणि दारासिंग पावरा यांच्यासह ग्रामस्थ उपस्थित होते.