ग्रामीण महाविद्यालयात ‘वाचन प्रेरणा दिन’ उत्साहात साजरा!
मान्यवरांसह गुणवंत माजी विद्यार्थ्यांचा गौरव; डॉ. ए. पी. जे. अब्दुल कलाम यांच्या विचारांचा जागर
मुखेड | प्रतिनिधी
विमुक्त जाती सेवा समिती संचलित ग्रामीण कला, वाणिज्य आणि विज्ञान महाविद्यालय, वसंतनगर येथील ग्रंथालय विभागाच्या वतीने भारतरत्न डॉ. ए. पी. जे. अब्दुल कलाम यांच्या जयंतीनिमित्त ‘वाचन प्रेरणा दिन’ उत्साहात साजरा करण्यात आला. महाविद्यालयाचे प्राचार्य डॉ. देविदास केंद्रे यांच्या अध्यक्षतेखाली झालेल्या या कार्यक्रमाला डॉ. सुग्रीव क्षीरसागर प्रमुख वक्ते म्हणून उपस्थित होते.
कार्यक्रमात वाचनाचे महत्त्व अधोरेखित करत विद्यार्थ्यांनी नियमित वाचनाची सवय जोपासावी आणि डॉ. कलाम यांच्या विचारांतून प्रेरणा घेऊन ज्ञान, विज्ञान व शिक्षणाच्या क्षेत्रात प्रगती साधावी, असे आवाहन करण्यात आले. कार्यक्रमाचे नियोजन ग्रंथालय सल्लागार समिती, प्रभारी ग्रंथालय प्रमुख प्रा. डॉ. महेश पेंटेवार आणि अमोल पवार यांनी केले.
माजी विद्यार्थ्यांकडून मान्यवरांचा सन्मान
कार्यक्रमानंतर माजी विद्यार्थ्यांच्या वतीने उपस्थित मान्यवरांचा शाल, पुष्पहार आणि पुष्पगुच्छ देऊन सत्कार करण्यात आला. यामध्ये प्रमुख वक्ते डॉ. सुग्रीव क्षीरसागर, प्रा. डॉ. कनकुटे, प्रा. डॉ. डी. सी. पवार यांच्यासह विद्यार्थ्यांना सातत्याने अभ्यासासाठी प्रेरित करणारे विद्यार्थीप्रिय प्रभारी ग्रंथालय प्रमुख प्रा. डॉ. महेश पेंटेवार यांचा विशेष सन्मान करण्यात आला.
महाविद्यालयीन जीवनात प्राध्यापकांनी केलेल्या मार्गदर्शनाचा आणि दिलेल्या प्रेरणेचा उल्लेख करत माजी विद्यार्थ्यांनी त्यांच्याप्रती कृतज्ञता व्यक्त केली. शिक्षकांचे मार्गदर्शन विद्यार्थ्यांच्या जडणघडणीत महत्त्वाची भूमिका बजावते, ही भावना या वेळी व्यक्त करण्यात आली.
गुणवंत माजी विद्यार्थ्यांचा गौरव
यानंतर महाविद्यालयाचे नाव उज्ज्वल करणाऱ्या गुणवंत माजी विद्यार्थ्यांचा मान्यवरांच्या हस्ते गौरव करण्यात आला. यामध्ये कोमलबाई नर्सिंग इन्स्टिट्यूटचे प्राचार्य तथा स्पर्धा परीक्षा प्रमुख संघशिल भद्रे उर्फ एस. एन. नांदेडकर, स्पर्धा परीक्षा अभ्यासक हरिश्चंद्र श्रीरामे आणि प्रा. दीपक राठोड यांना शाल व पुष्पगुच्छ देऊन सन्मानित करण्यात आले.
वाचनाची आवड, सातत्यपूर्ण अभ्यास आणि योग्य मार्गदर्शन यांच्या माध्यमातून विद्यार्थ्यांना शैक्षणिक व व्यावसायिक क्षेत्रात प्रगती साधता येते, हा संदेश या कार्यक्रमातून देण्यात आला. या प्रेरणादायी सोहळ्यास महाविद्यालयातील प्राध्यापक, कर्मचारी आणि विद्यार्थी मोठ्या संख्येने उपस्थित होते.
