कौटुंबिक वादातून तरुणाची हत्या; मेहुण्याला अटक

जळगावच्या शिवाजीनगर परिसरातील घटना; धारदार शस्त्राने हल्ला, आजीही जखमी

जळगाव (प्रतिनिधी) : जळगाव शहरातील शिवाजीनगर परिसरात कौटुंबिक वादातून झालेल्या हल्ल्यात सनी विनोद डोळे (वय २७, रा. शिवाजीनगर, जळगाव) या तरुणाचा मृत्यू झाला. सोमवारी (२६ ऑक्टोबर) दुपारी सुमारे एक वाजण्याच्या सुमारास ही घटना घडली. या प्रकरणी सनीचा मेहुणा सुरज नारायण वानखेडे (रा. कंडारी, ता. भुसावळ) याला पोलिसांनी अटक केली आहे. या घटनेमुळे परिसरात खळबळ उडाली असून, डोळे कुटुंबावर दुःखाचा डोंगर कोसळला आहे.

कौटुंबिक वादाचे रूपांतर हल्ल्यात

मिळालेल्या प्राथमिक माहितीनुसार, सनी डोळे आणि त्याचा मेहुणा सुरज वानखेडे यांच्यात कौटुंबिक कारणावरून वाद झाला. या वादाचे रूपांतर पुढे गंभीर हल्ल्यात झाले. यावेळी सुरज याने सनीवर धारदार शस्त्राने हल्ला केल्याचे सांगण्यात येत आहे. या हल्ल्यात सनी गंभीर जखमी झाला.

रुग्णालयात उपचारापूर्वीच मृत घोषित

हल्ल्यानंतर जखमी सनीला तातडीने जळगाव येथील शासकीय वैद्यकीय महाविद्यालय व रुग्णालयात दाखल करण्यात आले. मात्र, डॉक्टरांनी तपासणी केल्यानंतर त्याला मृत घोषित केले. तरुण मुलाच्या मृत्यूमुळे कुटुंबीयांवर दुःखाचा डोंगर कोसळला असून, नातेवाईकांमध्ये शोककळा पसरली आहे.

आजीच्या हातालाही दुखापत

या घटनेत सनीची आजी सुमनबाई तायडे यांच्या हातालाही दुखापत झाल्याची माहिती आहे. सनीच्या मृत्यूची बातमी समजताच त्याची आई आणि आजी यांनी रुग्णालयात केलेला आक्रोश उपस्थितांचे मन हेलावून टाकणारा होता. या हृदयद्रावक घटनेमुळे परिसरात हळहळ व्यक्त केली जात आहे.

संशयित मेहुण्याला अटक; पोलिसांकडून तपास सुरू

घटनेची माहिती मिळताच पोलिसांनी कारवाई करून सुरज वानखेडे याला ताब्यात घेत अटक केली. या प्रकरणी जळगाव शहर पोलीस ठाण्यात गुन्हा दाखल करण्याची प्रक्रिया सुरू असल्याची माहिती आहे. कौटुंबिक वादामागील नेमके कारण आणि घटनेची अन्य पार्श्वभूमी याबाबत पोलीस पुढील तपास करीत आहेत.