धरणगावचे डॉ. प्रभाकर पाटील यांना मानद डॉक्टरेट पुरस्काराने सन्मानित

ब्रह्मांड, सूर्य, चंद्र आणि ताऱ्यांच्या निर्मितीविषयक संशोधनाची दखल; नवी दिल्लीतील ‘भाव संवाद’ समारोहात गौरव

नवी दिल्ली | महापोलीस न्यूज | प्रतिनिधी :

धरणगाव येथे कार्यरत असलेले आणि जळगाव जिल्ह्यातील आव्हाणे गावचे मूळ रहिवासी डॉ. प्रभाकर नारायण पाटील यांना मानद डॉक्टरेट पुरस्काराने सन्मानित करण्यात आले. प्रेस्टीजियस पीस अवॉर्ड कौन्सिलतर्फे ब्रह्मांड, सूर्य, चंद्र आणि ताऱ्यांची निर्मिती कशी झाली, या विषयावरील त्यांच्या संशोधनाची दखल घेऊन हा सन्मान प्रदान करण्यात आला. २४ ऑक्टोबर २०२६ रोजी नवी दिल्ली येथे आयोजित ‘भाव संवाद’ समारोहात त्यांना हा पुरस्कार देऊन गौरविण्यात आले.

संशोधन कार्याची राष्ट्रीय स्तरावर दखल

पश्चिम दिल्लीतील मेपल गोल्ड रेडिसन ब्ल्यू येथे हा समारोह आयोजित करण्यात आला होता. शिक्षण, समाजसेवा, व्यवसाय आणि इतर विविध क्षेत्रांत उल्लेखनीय योगदान देणाऱ्या सुमारे ६० व्यक्तिमत्त्वांना या कार्यक्रमात विविध प्रतिष्ठित पुरस्कारांनी गौरविण्यात आले.

समाजातील विविध क्षेत्रांत उत्कृष्ट कार्य करणाऱ्या व्यक्तींच्या योगदानाची दखल घेणे, त्यांच्या कार्याला प्रोत्साहन देणे आणि इतरांनाही समाज व राष्ट्राच्या विकासासाठी प्रेरित करणे, हा या समारोहाचा मुख्य उद्देश होता.

विविध क्षेत्रांतील मान्यवरांचा गौरव

या समारोहात मानद डॉक्टरेट पुरस्कारासह समाजसेवा पुरस्कार, बिझनेस आयकॉन पुरस्कार, राष्ट्रीय शैक्षणिक उत्कृष्टता पुरस्कार आणि भारत प्रेरणा रत्न पुरस्कार प्रदान करण्यात आले.

कार्यक्रमाला माजी लोकसभा खासदार महाबल मिश्रा, तिबेटी निर्वासित संसदेचे माजी उपाध्यक्ष आचार्य यशी फुंडसोक, पीपीएचसी आणि आयईटी अकादमीचे अध्यक्ष सौरभ वशिष्ठ, आयटीबीपीचे निवृत्त कमांडंट योग प्रकाश यादव तसेच वृंदावन येथील आध्यात्मिक गुरू महंत प्रशांत गिरीजी महाराज यांची प्रमुख उपस्थिती होती.

धरणगाव आणि आव्हाणे परिसरातून अभिनंदन

डॉ. प्रभाकर नारायण पाटील यांना मानद डॉक्टरेट पुरस्कार मिळाल्याची बातमी समजल्यानंतर विविध स्तरांतून त्यांच्यावर अभिनंदनाचा वर्षाव होत आहे. त्यांच्या संशोधन कार्याची दखल घेत मिळालेला हा सन्मान धरणगाव आणि आव्हाणे परिसरासाठी अभिमानाची बाब मानली जात आहे.