भुसावळ तालुका पोलिसांची एम.डी. ड्रग्जविरोधात कारवाई; चौघांना अटक

किन्ही एमआयडीसी परिसरात पहाटे छापा; ६२.२१ ग्रॅम मेफेड्रोनसह ७ लाख २८ हजार ८४० रुपयांचा मुद्देमाल जप्त

भुसावळ | प्रतिनिधी – प्रमोद पाटील

जळगाव जिल्ह्यात अंमली पदार्थांची विक्री आणि तस्करी करणाऱ्यांविरोधात पोलिसांनी कारवाई सुरूच ठेवली आहे. भुसावळ तालुका पोलिसांनी किन्ही एमआयडीसी परिसरात शुक्रवार, दि. ६ नोव्हेंबर २०२६ रोजी पहाटे २.५५ वाजता छापा टाकून एम.डी. (मेफेड्रोन) ड्रग्ज जप्त केले. या कारवाईत ६२.२१ ग्रॅम मेफेड्रोन पावडरसह दोन मोटारसायकली आणि चार मोबाईल हँडसेट असा एकूण ७ लाख २८ हजार ८४० रुपयांचा मुद्देमाल हस्तगत करण्यात आला. याप्रकरणी चार जणांना अटक करण्यात आली आहे.

किन्ही एमआयडीसी परिसरात पहाटे छापा

भुसावळ तालुका पोलीस स्टेशनच्या हद्दीतील किन्ही एमआयडीसी परिसरात अंमली पदार्थांची विक्री व साठा असल्याची माहिती पोलिसांना मिळाली होती. त्यानुसार पोलिसांनी पहाटे छापा टाकून संशयितांकडून मेफेड्रोन (एम.डी.) हा अंमली पदार्थ जप्त केला. जप्त केलेल्या ६२.२१ ग्रॅम एम.डी. पावडरची किंमत २ लाख ४८ हजार ८४० रुपये असल्याचे पोलिसांनी नमूद केले आहे. यापैकी ५५.३३ ग्रॅम एम.डी. असगरखान याच्याकडून हस्तगत करण्यात आली.

चार जणांना अटक

या प्रकरणात पोलिसांनी खालील चार जणांना अटक केली आहे.

१. रिशभ कुणाल खेडकर (वय १८, रा. कंडारी, भुसावळ)
२. प्रथमेश दिलीप आव्हाड (वय २७, रा. दादासाहेब रुपवते सोसायटी, भुसावळ)
३. शेख अफजल शेख रहेमतुल्ला (वय २६, रा. नसरंजी फाईल, भुसावळ)
४. असगरखान अनवरखान (वय ५७, रा. अयान कॉलनी, भुसावळ)

दोन मोटारसायकली आणि चार मोबाईल जप्त

पोलिसांनी अंमली पदार्थांसह दोन मोटारसायकली आणि चार मोबाईल हँडसेट जप्त केले आहेत. जप्त मुद्देमालाचा तपशील पुढीलप्रमाणे :

• एम.डी. पावडर : ६२.२१ ग्रॅम – २ लाख ४८ हजार ८४० रुपये

• मोटारसायकली : रॉयल एनफिल्ड बुलेट आणि पल्सर – ३ लाख २५ हजार रुपये

• मोबाईल हँडसेट : आयफोन १६, आयफोन १३, टेक्नो आणि रेडमी – १ लाख ५५ हजार रुपये

अशा प्रकारे एकूण ७ लाख २८ हजार ८४० रुपयांचा मुद्देमाल पोलिसांनी जप्त केला आहे.

वरिष्ठ अधिकाऱ्यांच्या मार्गदर्शनाखाली कारवाई

ही कारवाई पोलीस अधीक्षक श्रीकांत धिवरे, अपर पोलीस अधीक्षक संदीप गावित आणि उपविभागीय पोलीस अधिकारी केदार बारबोले यांच्या मार्गदर्शनाखाली करण्यात आली. परिविक्षाधीन उपविभागीय पोलीस अधिकारी तथा भुसावळ तालुका पोलीस स्टेशनचे प्रभारी अधिकारी प्रशांत दरेकर यांच्या नेतृत्वाखाली भुसावळ तालुका पोलीस स्टेशनचे अधिकारी व अंमलदार तसेच जळगाव स्थानिक गुन्हे शाखेच्या पथकाने ही कारवाई केली.

एनडीपीएस कायद्यान्वये गुन्हा दाखल

या प्रकरणी भुसावळ तालुका पोलीस स्टेशनमध्ये गुन्हा रजिस्टर क्रमांक २२६/२०२६ अन्वये एनडीपीएस कायद्याच्या कलम ८(क), २२(क) आणि २९ अंतर्गत गुन्हा दाखल करण्यात आला आहे.

जळगाव जिल्ह्यात अंमली पदार्थांची विक्री, साठवणूक आणि वाहतूक करणाऱ्यांविरोधात कठोर कारवाई सुरू राहणार असल्याचा इशारा पोलिसांनी दिला आहे. अंमली पदार्थमुक्त जळगाव जिल्ह्यासाठी पोलीस प्रशासन कटिबद्ध असल्याचेही स्पष्ट करण्यात आले.