धडगाव बाजार समितीत लिलाव पद्धतीने शेतीमाल खरेदी सुरू करण्याची मागणी!

दिवाळीपर्यंत खरेदी सुरू न झाल्यास शेतकऱ्यांना सोबत घेऊन तीव्र जनआंदोलन छेडण्याचा लोक आंदोलन न्यासचा इशारा

धडगाव (प्रतिनिधी) : धडगाव कृषी उत्पन्न बाजार समितीत गेल्या तीन वर्षांपासून लिलाव पद्धतीने शेतीमालाची खरेदी होत नसल्याचा आरोप लोक आंदोलन न्यासचे कार्यकर्ते बबनराव फेंदा पावरा यांनी केला आहे. बाजार समितीत हंगामी शेतीमालाची लिलाव पद्धतीने खरेदी तातडीने सुरू करावी, अशी मागणी अक्राणी तहसीलदारांना दिलेल्या निवेदनातून करण्यात आली आहे. दिवाळीपर्यंत लिलाव पद्धतीने खरेदी सुरू न झाल्यास शेतकऱ्यांना सोबत घेऊन तीव्र जनआंदोलन छेडण्याचा इशाराही न्यासच्या वतीने देण्यात आला आहे.

तीन वर्षांपासून लिलाव बंद असल्याचा आरोप

तहसीलदारांना सादर केलेल्या निवेदनानुसार, धडगाव कृषी उत्पन्न बाजार समितीत गेल्या तीन वर्षांपासून हंगामी शेतीमालाचे लिलाव बंद आहेत. त्यामुळे शेतकऱ्यांना त्यांच्या उत्पादित मालाला बाजारभावानुसार योग्य दर मिळत नसल्याचे निवेदनात म्हटले आहे.

धडगाव तालुक्यातील लहान-मोठे शेतकरी मोठ्या कष्टाने मका, ज्वारी, भुईमूग, सोयाबीन, उडीद आदी पिकांचे उत्पादन घेतात. मात्र, स्थानिक व्यापाऱ्यांकडून या मालाची मनमानी दराने खरेदी होत असल्याचा आरोप करण्यात आला आहे. परिणामी, शेतकऱ्यांना आपला शेतीमाल कमी दराने विकावा लागत असून आर्थिक नुकसान सहन करावे लागत असल्याचे निवेदनात नमूद केले आहे.

बाजार समितीच्या पारदर्शकतेवर प्रश्नचिन्ह

स्थानिक व्यापाऱ्यांना मनमानी पद्धतीने शेतीमाल खरेदी करण्याची संधी मिळत असताना बाजार समिती शेतकऱ्यांच्या हितासाठी अपेक्षित भूमिका बजावत नसल्याचा आरोपही करण्यात आला आहे. बाजार समितीच्या कामकाजात पारदर्शकतेचा अभाव असल्याचे सांगत, प्रत्यक्षात लिलाव होत नसतानाही कागदोपत्री लिलाव पद्धतीने शेतीमाल खरेदी झाल्याचे दाखवले जात असल्याचा गंभीर दावा निवेदनातून करण्यात आला आहे.

दिवाळीपर्यंत मुदत; अन्यथा आंदोलन

दिवाळीपर्यंत हंगामी पिकांच्या शेतीमालाची लिलाव पद्धतीने खरेदी सुरू न झाल्यास लोक आंदोलन न्यासचे तालुकाध्यक्ष फेंदा पारशी पावरा, सचिव भीमसिंग खाअल्या पराडके, सहसचिव भरत दोहाण्या पावरा आणि बबनराव फेंदा पावरा यांच्या नेतृत्वाखाली शेतकऱ्यांना सोबत घेऊन जनआंदोलन छेडण्यात येईल, असा इशारा देण्यात आला आहे.

या निवेदनावर लोक आंदोलन न्यासचे कार्यकर्ते बबनराव फेंदा पावरा यांची स्वाक्षरी आहे. तहसीलदार अक्राणी यांना निवेदन सादर करताना भीमसिंग पराडके, भरत पावरा आणि बबनराव पावरा उपस्थित होते.