Spread the love

भाजपाच्या विराट मोर्चातून संजय शर्मांवर कठोर कारवाईची मागणी; आमदार अनुप अग्रवाल यांच्या नेतृत्वात जनसागर रस्त्यावर!

महापौर मायादेवी परदेशी यांच्याविषयी वादग्रस्त पोस्टप्रकरणी भाजप आक्रमक; ‘सीडीआर तपासा, अवैध धंदे बंद करा’ अशा घोषणांनी धुळे दणाणले

धुळे (प्रतिनिधी) : महापौर मायादेवी परदेशी यांच्याविषयी वादग्रस्त पोस्ट टाकल्याप्रकरणी शिवप्रतिष्ठान हिंदुस्थानचे संजय शर्मा यांच्यावर कठोर कारवाई करण्यात यावी, या मागणीसाठी धुळ्यात भारतीय जनता पक्षाच्या वतीने विराट मोर्चा काढण्यात आला. आमदार अनुप अग्रवाल यांच्या नेतृत्वाखाली निघालेल्या या मोर्चात भाजप पदाधिकारी, कार्यकर्ते आणि नागरिक मोठ्या संख्येने सहभागी झाले होते. मोर्चातील गर्दीमुळे शहरात राजकीय वातावरण तापले.

आग्रा रोडवरील छत्रपती शिवाजी महाराज यांच्या पुतळ्यापासून मोर्चाला सुरुवात झाली. विविध घोषणांनी परिसर दणाणून सोडत हा मोर्चा जिल्हा पोलीस अधीक्षक कार्यालयावर धडकला. संजय शर्मा यांच्याविरोधात कठोर कारवाई करण्यासह त्यांच्या कॉल डिटेल रेकॉर्डची (सीडीआर) तपासणी करावी आणि धुळे शहरातील अवैध धंद्यांवर कारवाई करावी, अशा प्रमुख मागण्या यावेळी करण्यात आल्या.

पोलिस अधीक्षकांना निवेदन; कारवाईची मागणी

मोर्चाच्या शेवटी जिल्हा पोलीस अधीक्षकांना निवेदन देण्यात आले. महापौर मायादेवी परदेशी यांच्याविषयी करण्यात आलेल्या कथित वादग्रस्त पोस्टप्रकरणी संजय शर्मा यांच्यावर कठोर कारवाई करावी, त्यांच्या सीडीआरची तपासणी करावी आणि शहरातील अवैध धंदे बंद करण्यासाठी प्रभावी पावले उचलावीत, अशी मागणी निवेदनातून करण्यात आली.

आमदार अनुप अग्रवाल यांच्या नेतृत्वाखाली निघालेल्या या मोर्चातून भाजपने या प्रकरणी आक्रमक भूमिका घेतल्याचे स्पष्ट झाले. आता पोलिस प्रशासन या मागण्यांवर काय भूमिका घेते आणि पुढील कोणती कारवाई करते, याकडे धुळेकरांचे लक्ष लागले आहे.

Share.
Leave A Reply

Exit mobile version