कौटुंबिक कलहासह शिक्षण, आरोग्य व बेरोजगारीसारख्या प्रश्नांवर मार्गदर्शन; अनोख्या लकी ड्रॉद्वारे उद्घाटन
जळगाव : कौटुंबिक कलह हा केवळ पती-पत्नीतील वादापुरता मर्यादित नसून शिक्षण, आरोग्य, बेरोजगारी आणि सामाजिक ताणतणावाशी निगडित व्यापक विषय आहे, या संकल्पनेवर आधारित महाराष्ट्र लेवा पाटीदार महासंघाच्या समुपदेशन केंद्राचे उद्घाटन जळगावातील ओंकारनगर येथे उत्साहात पार पडले.
दि. २२ एप्रिल २०२६ रोजी सायंकाळी ५ वाजता खान्देश शाखेच्या “कौटुंबिक कलह समुपदेशन केंद्र”ाचा छोटेखानी पण सुबक सोहळा आयोजित करण्यात आला होता. कार्यक्रमाला समाजातील अनेक मान्यवरांची उपस्थिती लाभली.
या प्रसंगी महासंघाचे ज्येष्ठ सल्लागार तथा माजी नगराध्यक्ष बंडू काळे, अध्यक्ष अरुण बोरोले, खान्देश महिला उपाध्यक्षा सौ. नीता वराडे, कोशाध्यक्ष डॉ. मिलिंद पाटील, जळगाव जिल्हा लेवा पाटीदार मंडळाचे अध्यक्ष लिलाधर चौधरी, डॉ. ॲड. सौ. ज्योती भोळे आदी मान्यवर मंचावर उपस्थित होते.
प्रास्ताविक करताना अध्यक्ष अरुण बोरोले यांनी समुपदेशन समितीची भूमिका स्पष्ट केली. कौटुंबिक वादांसोबतच शिक्षणातील अडचणी, आरोग्याच्या समस्या, बेरोजगारी आणि शेतकऱ्यांच्या प्रश्नांवरही हे केंद्र मार्गदर्शन करणार असल्याचे त्यांनी सांगितले.
कार्यक्रमात एक वेगळा उपक्रम राबवत उपस्थितांमधून लकी ड्रॉ काढण्यात आला. त्यातून निवड झालेल्या शांताराम फेगडे यांच्या हस्ते समुपदेशन केंद्राचे उद्घाटन करण्यात आले. या अनोख्या पद्धतीचे सर्वत्र कौतुक झाले.
यावेळी बंडू काळे यांनी समुपदेशन समितीचे काम निःपक्षपणे आणि काटेकोरपणे पार पाडण्याची ग्वाही दिली. प्रत्येक प्रकरण समाजाभिमुख दृष्टिकोनातून हाताळले जाईल, असे त्यांनी नमूद केले. माजी जिल्हा परिषद आरोग्य सभापती कमलाकर रोटे यांनीही या उपक्रमाचे स्वागत करून सहकार्याचे आश्वासन दिले.
समारंभाला लेवा पाटीदार समाजातील पदाधिकारी, सदस्य तसेच महिला-भगिनी मोठ्या संख्येने उपस्थित होते. कार्यक्रमाचे सूत्रसंचालन डॉ. मिलिंद पाटील यांनी केले, तर आभार प्रदर्शन महेंद्र पाटील यांनी मानले. कार्यक्रमाच्या शेवटी श्रीमती साधना लोखंडे यांनी सादर केलेल्या पसायदानाने वातावरण भारावून गेले.
