माजी जिल्हा परिषद सदस्य प्रताप पाटील यांच्या नावामुळे बदलते समीकरण; भाजपसमोर नवे आव्हान, महायुतीत तणाव शिगेला
उमेदवारीवरून भाजप-शिंदे सेनेत रस्सीखेच; ‘मैत्रीपूर्ण’ लढतीची शक्यता, खर्चिक निवडणुकीने इच्छुक सावध
जळगाव | मुकुंदराव नंन्नवरे : जळगाव जिल्ह्यातील स्थानिक स्वराज्य संस्था मतदारसंघाच्या विधान परिषदेच्या रिक्त जागेसाठी महायुतीत चुरस वाढत असून, चालू वाटाघाटींमध्ये ही जागा शिंदे सेनेला जाण्याची दाट शक्यता व्यक्त होत आहे. भाजप आणि शिंदे सेनेने या जागेसाठी जोरदार मोर्चेबांधणी सुरू केल्याने उमेदवारीवरून दोन्ही पक्षांमध्ये तणाव निर्माण झाला आहे.
राजकीय सूत्रांच्या माहितीनुसार, परभणी आणि नाशिकमधील जागांच्या वाटाघाटीच्या पार्श्वभूमीवर जळगावची जागा शिंदे गटाला देण्याचा पर्याय गांभीर्याने विचारात घेतला जात आहे. परभणी मतदारसंघात भाजपचे वर्चस्व वाढल्याचे दिसत असताना, नाशिकमध्ये शहरी भागात भाजप तर ग्रामीण भागात शिंदे गटाची ताकद दिसून येते. या संतुलनाच्या राजकारणात जळगावची जागा शिंदे सेनेला मिळण्याची शक्यता बळावली आहे. जळगाव मतदारसंघात जवळपास १००० मते असून भाजप आणि शिंदे सेनेमध्ये ३० ते ३५ मतांचे अंतर असल्याचे सांगितले जाते. त्यामुळे अंतिम वाटाघाटीत परभणी भाजपला आणि जळगाव शिंदे गटाला असा फॉर्म्युला निश्चित होण्याची चर्चा रंगली आहे.
या पार्श्वभूमीवर पाणीपुरवठा व स्वच्छता मंत्री गुलाबराव पाटील यांचे सुपुत्र, माजी जिल्हा परिषद सदस्य प्रताप पाटील यांचे नाव आघाडीवर आले आहे. मंत्री पाटील यांचे राज्यातील वरिष्ठ नेत्यांशी असलेले निकट संबंध आणि जिल्ह्यातील मजबूत जनसंपर्क यामुळे प्रताप पाटील यांच्या उमेदवारीला बळ मिळत असल्याचे मानले जात आहे.
विशेष म्हणजे, प्रताप पाटील यांचे नाव पुढे आल्याने भाजपसमोर मोठे आव्हान निर्माण झाले आहे. महायुतीत एकमताने उमेदवार देण्याचा प्रयत्न सुरू असला तरी जागा वाटपाचा तिढा न सुटल्यास ‘मैत्रीपूर्ण’ लढत होण्याची शक्यता नाकारता येत नाही. त्यामुळे या निवडणुकीकडे जिल्ह्याचे लक्ष लागले आहे.
गेल्या काही वर्षांत जळगावमध्ये शिंदे सेनेची ताकद लक्षणीयरीत्या वाढली आहे. संघटनात्मक मजबुती आणि जनसंपर्कामुळे पक्ष आक्रमक भूमिकेत आहे. कार्यकर्त्यांकडून प्रताप पाटील यांना उमेदवारी देण्याची मागणी जोर धरत आहे. सामाजिक कार्यात सक्रिय सहभाग आणि सर्वसामान्यांशी असलेली जवळीक यामुळे त्यांची प्रतिमा बळकट झाली आहे.
दुसरीकडे भाजपकडून उद्योजक नंदकुमार अडवाणी, माजी जि.प. सदस्य नंदकिशोर महाजन आणि अमोल शिंदे यांची नावे चर्चेत आहेत. जिल्ह्यातील मजबूत संघटना आणि मतदारसंघातील प्रभाव पाहता भाजपही ही जागा सहज सोडण्याच्या मनःस्थितीत नाही. दरम्यान, राष्ट्रवादी काँग्रेस (अजित पवार गट) मतदारांची भूमिका या निवडणुकीत ‘किंगमेकर’ ठरू शकते, अशी चर्चा आहे. महाविकास आघाडीने अद्याप सावध भूमिका घेतली असून योग्य वेळी रणनीती जाहीर केली जाईल.
💰 महागडी निवडणूक; इच्छुकांमध्ये संभ्रम
विधान परिषदेची निवडणूक पारंपरिकरीत्या खर्चिक मानली जाते. २०१० मधील निवडणूक विशेष चर्चेत होती. यावेळीही थेट लढत झाल्यास खर्च वाढण्याची शक्यता आहे. त्यामुळे अनेक इच्छुक पुढे येण्यास उत्सुक असले तरी आर्थिक गणितामुळे सावध भूमिका घेत आहेत. जर भाजप आणि शिंदे सेनेमध्ये अंतिम युती फॉर्म्युला निश्चित झाला, तर महायुतीसाठी निवडणूक सोपी होऊ शकते. त्यामुळे अंतिम निर्णयानंतरच इच्छुकांची संख्या आणि राजकीय समीकरणे स्पष्ट होतील, असे जाणकारांचे मत आहे. एकूणच, जळगाव विधान परिषदेची ही निवडणूक महायुतीतील अंतर्गत राजकारण, संभाव्य ‘मैत्रीपूर्ण’ लढत आणि इतर पक्षांच्या भूमिकेमुळे अत्यंत रंगतदार ठरण्याची चिन्हे स्पष्ट दिसत आहेत.
