आरोपींना तात्काळ अटक करून ‘मोका’ अंतर्गत कारवाईची मागणी; पोलीस प्रशासनाला निवेदन
जळगाव : भारतरत्न डॉ. बाबासाहेब आंबेडकर जयंती उत्सव समिती, जळगाव शहरचे अध्यक्ष मुकुंद भाऊ सपकाळे यांच्यावर ११ एप्रिल रोजी झालेल्या प्राणघातक हल्ल्याची गंभीर दखल शिवसेना शिंदे गटाने घेतली आहे. या घटनेमुळे शहरात संतापाचे वातावरण निर्माण झाले असून आरोपींविरोधात कठोर कारवाईची मागणी जोर धरू लागली आहे.
शिवसेना शिंदे गटाचे प्रवक्ते किरण सोनावणे यांनी अतिरक्त पोलीस अधीक्षक संदीप गावित यांची भेट घेऊन संबंधित प्रकरणात आरोपींना तात्काळ अटक करण्याची मागणी केली. तसेच या हल्ल्यामागील कट उघड करून आरोपींवर ‘मोका’ (महाराष्ट्र संघटित गुन्हेगारी नियंत्रण कायदा) अंतर्गत कठोर कारवाई करण्यात यावी, असे निवेदनाद्वारे स्पष्ट करण्यात आले.
या वेळी निवेदन सादर करताना वंचित बहुजन आघाडीचे जिल्हा सचिव प्रा. प्रीतीलाल पवार आणि राष्ट्रीय भीमसेनेचे जिल्हाध्यक्ष वाल्मिक जाधव यांची उपस्थिती होती. सर्वांनी एकमुखाने या घटनेचा निषेध करत न्याय मिळवून देण्याची मागणी केली. दरम्यान, या प्रकरणात पोलीस प्रशासनाकडून जलद तपास होऊन दोषींवर कठोर कारवाई होईल, अशी अपेक्षा व्यक्त केली जात आहे.
