मनसे आक्रमक; मराठीत संवाद अनिवार्य करण्याची मागणी, अन्यथा कायदेशीर कारवाईचा इशारा
फोनवर मराठीत बोलण्यास नकार | महाराष्ट्र अधिकृत भाषा कायद्याचा मुद्दा | मनसेकडून नोटीस
टिटवाळा : टिटवाळा परिसरात Zeno Medical या औषध विक्री केंद्राविरोधात मराठी भाषेच्या अवमानाची गंभीर घटना समोर आली आहे. एका स्थानिक क्रमांकावरून करण्यात आलेल्या फोन कॉलदरम्यान संबंधित कर्मचाऱ्याने मराठी भाषेत संवाद साधण्यास स्पष्ट नकार दिल्याची बाब उघड झाल्याने परिसरात संताप व्यक्त केला जात आहे.
महाराष्ट्रात कार्यरत असलेल्या आस्थापनांनी स्थानिक अधिकृत भाषा असलेल्या मराठीचा वापर करणे अपेक्षित असताना अशा प्रकारची घटना घडल्याने भाषिक अस्मितेचा प्रश्न पुन्हा ऐरणीवर आला आहे. या पार्श्वभूमीवर महाराष्ट्र नवनिर्माण सेना (मनसे) आक्रमक झाली असून संबंधित व्यवस्थापनाला ७ दिवसांचा अल्टिमेटम देण्यात आला आहे.
कायद्याचा आधार घेत मनसेचा इशारा
राज्यात लागू असलेल्या ‘महाराष्ट्र अधिकृत भाषा अधिनियम, १९६४’नुसार शासकीय, निमशासकीय तसेच नागरिकांना सेवा देणाऱ्या खाजगी संस्थांनी व्यवहारात मराठी भाषेचा वापर करणे बंधनकारक आहे. या कायद्याचे उल्लंघन झाल्यास संबंधितांवर कायदेशीर कारवाई होऊ शकते.
मनसेकडून देण्यात आलेल्या नोटीसमध्ये स्पष्ट करण्यात आले आहे की, संबंधित मेडिकलने आपल्या सर्व कर्मचाऱ्यांना मराठी भाषेत संवाद साधण्याचे सक्त निर्देश द्यावेत. अन्यथा पोलीस तक्रार दाखल करून पुढील कायदेशीर कारवाई करण्यात येईल, असा इशारा देण्यात आला आहे.
मनसे पदाधिकाऱ्यांची उपस्थिती
या वेळी मनसेच्या वतीने दिलीप पुनमचंद राठोड (विशेष कार्यकारी अधिकारी), ॲड. अविनाश पांडुरंग शिळकंदे (उपाध्यक्ष – महाराष्ट्र नवनिर्माण महापालिका कर्मचारी सेना), ॲड. महेश गायकवाड (नोटरी व वकील) आणि रोहित जोशी (महाराष्ट्र सैनिक) उपस्थित होते. त्यांनी या घटनेचा तीव्र निषेध व्यक्त करत मराठी भाषेचा सन्मान राखण्याची मागणी केली.
परिसरात संतापाची लाट
या घटनेनंतर टिटवाळा परिसरात नागरिकांमध्ये तीव्र नाराजी व्यक्त होत असून, स्थानिक भाषेचा आदर राखणे ही प्रत्येक संस्थेची जबाबदारी असल्याचे मत व्यक्त केले जात आहे. मराठी भाषेला दुय्यम वागणूक दिली जाणार नाही, असा इशाराही नागरिकांनी दिला आहे. एकूणच, या प्रकरणामुळे राज्यात पुन्हा एकदा मराठी भाषेच्या वापराबाबत चर्चा रंगली असून, संबंधित आस्थापनाने काय भूमिका घेतली जाते, याकडे सर्वांचे लक्ष लागले आहे.
