इराणमध्ये अन्नान्न दशा, महागाईचा भडका!

> पाणी साठवण्यासाठी नागरिकांची पायपीट

तेहरान : अमेरिका आणि इराणमधील वाढत्या तणावाचे रूपांतर आता थेट इराणच्या अंतर्गत भागात भीषण संकटात झाले आहे. युद्धाच्या होरपळीत इराणची अर्थव्यवस्था पूर्णपणे कोलमडली असून, देशात अन्नान्न दशा निर्माण झाली आहे. बाजारपेठेत जीवनावश्यक वस्तूंचे भाव गगनाला भिडले असून, सर्वसामान्य नागरिकांना जगणे कठीण झाले आहे. केवळ अन्नच नाही, तर पिण्याच्या पाण्यासाठीही नागरिक आता संघर्ष करत आहेत.

इराणमधील स्थानिक बाजारपेठांमधून मिळालेल्या माहितीनुसार, खाद्यपदार्थांच्या किमतीत अनेक पटींनी वाढ झाली आहे. युद्धाच्या धास्तीने नागरिकांनी मोठ्या प्रमाणावर साठेबाजी सुरू केली असून, दुकानांमधील जीवनावश्यक वस्तूंचे कप्पे रिकामे झाले आहेत. विशेष म्हणजे, भविष्यात पाणीपुरवठा खंडित होईल या भीतीने इराणमधील नागरिक मोठ्या प्रमाणावर पिण्याच्या पाण्याचा साठा करत आहेत. पिण्याच्या पाण्याच्या बाटल्या आणि कॅनसाठी स्टोअर्सबाहेर लांबच लांब रांगा पाहायला मिळत आहेत.

तेल निर्यात ठप्प; बंदरांवर शुकशुकाट

इराणच्या अर्थव्यवस्थेचा मुख्य कणा असलेल्या तेल उद्योगाला या संघर्षाचा मोठा फटका बसला आहे. अमेरिकेच्या नाकेबंदीमुळे आणि सुरक्षेच्या कारणास्तव इराणच्या बंदरांवर रिकामे टँकर पोहोचू शकत नाहीत. रिकामे टँकर न आल्याने कच्च्या तेलाची साठवणूक करण्याची क्षमता संपत आली असून, निर्यात पूर्णपणे ठप्प होण्याच्या मार्गावर आहे. यामुळे इराणच्या सरकारी तिजोरीवर मोठा ताण पडला असून देशाला मिळणारे परकीय चलन बंद झाले आहे.

इंटरनेटवर बंदी आणि माहितीचा खोळंबा

देशांतर्गत परिस्थिती नियंत्रणात ठेवण्यासाठी आणि संभाव्य निदर्शने रोखण्यासाठी इराण सरकारने अनेक भागांत इंटरनेट सेवा पूर्णपणे ठप्प केली आहे. यामुळे बाह्य जगाशी इराणचा संपर्क तुटला असून, देशांतर्गत नेमकी काय परिस्थिती आहे, याची माहिती मिळवणे कठीण झाले आहे. इंटरनेटअभावी बँकिंग सेवा आणि ऑनलाईन व्यवहारही कोलमडले असून त्याचा थेट परिणाम व्यापारावर झाला आहे.

मानवी संकटाची भीती

जागतिक निरीक्षकांच्या मते, जर अमेरिकेने दिलेला ७२ तासांचा अल्टिमेटम संपण्यापूर्वी तोडगा निघाला नाही, तर इराणमध्ये भीषण मानवी संकट उभे राहू शकते. औषधांचा तुटवडा आणि अन्नाची कमतरता यामुळे लहान मुले आणि वृद्धांचे हाल होत आहेत. आधीच आर्थिक निर्बंधांचा सामना करणाऱ्या इराणसाठी हे ‘दुहेरी संकट’ ठरले असून, देशात अराजकता माजण्याची शक्यता वर्तवण्यात येत आहे.