पवित्र नाम देवालय चर्चतर्फे सात दिवसीय ‘व्हॅकेशन बायबल स्कूल’ शिबिर उत्साहात संपन्न
पुणे (शंकर जोग) : पुण्यातील गुरुवार पेठ येथील पवित्र नाम देवालय चर्चच्या वतीने उन्हाळी सुट्ट्यांचा सदुपयोग व्हावा या उद्देशाने आयोजित करण्यात आलेले विशेष व्हॅकेशन बायबल स्कूल (VBS) शिबिर अत्यंत उत्साहपूर्ण वातावरणात पार पडले. सात दिवस चाललेल्या या शिबिरात परिसरातील सुमारे ८० हून अधिक मुला-मुलींनी उत्स्फूर्त सहभाग नोंदवला.
या शिबिरामध्ये मुलांसाठी आध्यात्मिक, शैक्षणिक आणि मनोरंजक उपक्रमांची आकर्षक मेजवानी ठेवण्यात आली होती. बायबलमधील प्रेरणादायी कथा, सुमधुर गाणी, कृतीगीते, नृत्य, लघुनाटिका तसेच विविध प्रकारच्या कलाकुसरीच्या वस्तू तयार करण्याचे प्रशिक्षण मुलांना देण्यात आले. मुलांमधील सुप्त कला आणि सर्जनशीलतेला वाव देत त्यांच्यावर सुसंस्कार घडविणे हा या उपक्रमाचा मुख्य उद्देश होता.
शिबिराच्या सांगता समारंभाला पालकांची मोठ्या प्रमाणात उपस्थिती लाभली. यावेळी मुलांनी शिबिरात शिकलेल्या कला, गाणी, नृत्य आणि नाट्यप्रयोग सादर करून उपस्थितांची मने जिंकली. चर्चचे मुख्य पाळक रेव्ह. कॅरप, रेव्ह. गायकवाड, रेव्ह. आढाव तसेच प्रमुख पाहुण्या सौ. बबिता कवाडे यांनी सहभागी मुलांचे आणि शिक्षकांचे कौतुक करत त्यांना प्रोत्साहन दिले.
शिबिराच्या समारोपावेळी सर्व विद्यार्थ्यांना प्रमाणपत्रे आणि आकर्षक बक्षिसे देऊन गौरविण्यात आले. या उपक्रमाबद्दल पालकांनी चर्च प्रशासनाचे आभार व्यक्त करत अशा शिबिरांची आजच्या काळात मोठी गरज असल्याची भावना व्यक्त केली. या यशस्वी शिबिरासाठी रेव्ह. कॅरप, रेव्ह. गायकवाड, रेव्ह. आढाव यांच्यासह मनोज येवलेकर, प्राजक्ता पारोळ, विकास उमापती, विजया इंदुरकर, रोजमेरी साठे, निखिल टाकळकर, मालती नॉर्टन, जयमाला सूर्यवंशी आणि अन्य स्वयंसेवकांनी विशेष परिश्रम घेतले.
