गुप्त माहितीच्या आधारे बसस्थानकावर सापळा; दोन संशयित ताब्यात, ८७ हजारांची विदेशी दारू जप्त
नंदुरबार (संजय मोहिते) : नंदुरबारहून राज्य परिवहन महामंडळाच्या (एसटी) बसमधून गुजरात राज्यात अवैधरित्या विदेशी दारूची तस्करी करण्याचा मोठा प्रयत्न नंदुरबार शहर पोलिसांनी हाणून पाडला आहे. गुप्त माहितीच्या आधारे बसस्थानक परिसरात सापळा रचत पोलिसांनी धडक कारवाई केली असून, दोन संशयितांना ताब्यात घेत सुमारे ८७ हजार रुपये किमतीची विदेशी दारू जप्त करण्यात आली आहे.
मिळालेल्या माहितीनुसार, संशयित आरोपी एसटी बसचा वापर करून नंदुरबारहून गुजरातमधील डेडियापाडा येथे विदेशी मद्याची चोरटी वाहतूक करण्याच्या तयारीत होते. या हालचालीची गोपनीय माहिती नंदुरबार शहर पोलिसांना मिळताच त्यांनी तातडीने बसस्थानक परिसरात पाळत ठेवली आणि संशयितांची कसून तपासणी केली.
तपासणीदरम्यान आरोपींकडील सामानातून मोठ्या प्रमाणात विदेशी दारूचा साठा आढळून आला. पोलिसांनी तत्काळ दारूचा साठा जप्त करून दोन्ही संशयितांना ताब्यात घेतले. प्राथमिक पंचनाम्यानुसार जप्त करण्यात आलेल्या विदेशी मद्याची किंमत सुमारे ८७ हजार रुपये असल्याची माहिती समोर आली आहे.
गुजरात राज्यात मद्यबंदी लागू असल्याने महाराष्ट्रातून विविध मार्गांनी दारूची अवैध तस्करी करण्याचे प्रकार अधूनमधून उघडकीस येत असतात. अशा पार्श्वभूमीवर एसटी बससारख्या सार्वजनिक वाहतूक व्यवस्थेचा वापर करून दारू तस्करी करण्याचा हा प्रयत्न पोलिसांनी वेळेत उधळून लावल्याने मोठे यश मानले जात आहे.
या प्रकरणी नंदुरबार शहर पोलीस ठाण्यात संबंधित कायद्यांनुसार गुन्हा दाखल करण्याची प्रक्रिया सुरू असून, आरोपींनी यापूर्वीही अशा प्रकारची तस्करी केली आहे का, त्यांचे इतर साथीदार कोण आहेत आणि या रॅकेटचा विस्तार किती मोठा आहे, याचा सखोल तपास पोलीस करीत आहेत.
ही उल्लेखनीय कारवाई नंदुरबार शहर पोलीस निरीक्षक नीलेश देसले यांच्या मार्गदर्शनाखाली त्यांच्या पथकाने केली. या कारवाईमुळे अवैध दारू तस्करी करणाऱ्यांमध्ये खळबळ उडाली असून, जिल्ह्यात अशा बेकायदेशीर कारवायांविरोधात पोलिसांनी कठोर भूमिका घेतल्याचे पुन्हा एकदा स्पष्ट झाले आहे.
