वारंवार मुदतवाढ देऊनही प्रक्रिया अपूर्ण; दरमहा १,५०० रुपयांचा लाभ बंद, बनावट कागदपत्रांवर लाभ घेणाऱ्यांवरही कायदेशीर कारवाईची तयारी
नंदुरबार : ‘मुख्यमंत्री माझी लाडकी बहीण’ योजनेअंतर्गत लाभ घेणाऱ्या नंदुरबार जिल्ह्यातील दोन हजारांहून अधिक महिलांना ई-केवायसी (e-KYC) प्रक्रिया पूर्ण न केल्यामुळे मोठा फटका बसला आहे. आवश्यक कागदपत्रांची पूर्तता न झाल्याने या महिलांना योजनेसाठी अपात्र घोषित करण्यात आले असून, त्यांनी आतापर्यंत घेतलेल्या लाभाच्या रकमेचीही शासनाकडून वसुली केली जाणार असल्याची माहिती समोर आली आहे.
राज्य सरकारने योजना सुरू झाल्यानंतर विविध ठिकाणी बनावट कागदपत्रांच्या आधारे अपात्र व्यक्तींनी लाभ घेतल्याच्या तक्रारींची दखल घेत सर्व लाभार्थ्यांची सखोल पडताळणी सुरू केली होती. त्याअंतर्गत ई-केवायसी, आधार संलग्नता, बँक खात्यांची माहिती आणि कुटुंबाच्या वार्षिक उत्पन्नाची तपासणी करण्यात आली.
प्रशासनाने लाभार्थी महिलांना ई-केवायसी प्रक्रिया पूर्ण करण्यासाठी अनेकदा मुदतवाढ दिली होती. विविध माध्यमांतून जनजागृती करून वारंवार आवाहनही करण्यात आले. मात्र, त्यानंतरही नंदुरबार जिल्ह्यातील दोन हजारांहून अधिक महिलांनी ही प्रक्रिया पूर्ण केली नाही. परिणामी त्यांना योजनेच्या लाभासाठी अपात्र ठरविण्यात आले आहे.
या निर्णयामुळे संबंधित महिलांना दरमहा मिळणारा १,५०० रुपयांचा आर्थिक लाभ तत्काळ बंद होणार आहे. यासोबतच योजनेच्या सुरुवातीपासून गेल्या पावणेदोन वर्षांत शासनाकडून त्यांच्या खात्यात जमा झालेली रक्कमही नियमानुसार परत वसूल करण्याची प्रक्रिया सुरू होणार असल्याची माहिती मिळत आहे. त्यामुळे अनेक लाभार्थ्यांसमोर आर्थिक अडचणी निर्माण होण्याची शक्यता व्यक्त होत आहे.
दरम्यान, पडताळणीदरम्यान काही पुरुषांनीही खोटी माहिती व बनावट कागदपत्रांच्या आधारे या योजनेचा लाभ घेतल्याचे प्रकार उघडकीस आल्याची प्राथमिक माहिती आहे. अशा प्रकरणांमध्ये संबंधितांकडून संपूर्ण लाभाची रक्कम वसूल करण्याबरोबरच त्यांच्याविरुद्ध पोलीस ठाण्यात गुन्हे दाखल करून कठोर कायदेशीर कारवाई करण्याची तयारी प्रशासनाने सुरू केली असल्याचे समजते.
प्रशासनाने स्पष्ट केले आहे की, शासकीय योजनांमध्ये पारदर्शकता राखण्यासाठी पडताळणी प्रक्रिया अधिक काटेकोर करण्यात आली असून नियमांचे पालन न करणाऱ्या किंवा चुकीची माहिती देणाऱ्या लाभार्थ्यांविरोधात आवश्यक ती कारवाई करण्यात येईल. त्यामुळे नागरिकांनी शासकीय योजनांचा लाभ घेताना सर्व कागदपत्रे अचूक ठेवून आवश्यक प्रक्रिया वेळेत पूर्ण कराव्यात, असे आवाहन करण्यात आले आहे.
