‘माझी वसुंधरा अभियान 7.0’ आणि ‘स्वच्छ सर्वेक्षण 2026’ अंतर्गत ABC कार्यक्रमाची अंमलबजावणी; निर्बीजीकरणाद्वारे भटक्या कुत्र्यांची वाढ रोखण्याचा प्रयत्न
भटक्या कुत्र्यांवर नियंत्रणासाठी विशेष मोहीम • ABC कार्यक्रमांतर्गत निर्बीजीकरण • नागरिकांच्या सुरक्षिततेला प्राधान्य • नगरपरिषदेचे सहकार्याचे आवाहन
एरंडोल (प्रतिनिधी – मयुर पाटील) : एरंडोल शहरातील भटक्या कुत्र्यांच्या वाढत्या समस्येवर नियंत्रण मिळविण्यासाठी एरंडोल नगरपरिषदेने प्रभावी पावले उचलण्यास सुरुवात केली आहे. ‘माझी वसुंधरा अभियान 7.0’ तसेच ‘स्वच्छ सर्वेक्षण 2026’ अंतर्गत शहरात विशेष मोहीम राबविण्यात येत असून भटक्या कुत्र्यांच्या निर्बीजीकरणावर भर देण्यात येत आहे.
नगरपरिषदेच्या माहितीनुसार, मा. मुख्याधिकारी आणि मा. नगराध्यक्ष यांच्या मार्गदर्शनाखाली ABC (Animal Birth Control) कार्यक्रमाची प्रभावी अंमलबजावणी सुरू आहे. या अंतर्गत शहरातील आक्रमक व घातक भटक्या कुत्र्यांना पकडून त्यांचे शास्त्रोक्त पद्धतीने निर्बीजीकरण करण्यात येत आहे.
शहरात दिवसेंदिवस भटक्या कुत्र्यांची संख्या वाढत असल्याने नागरिकांमध्ये भीतीचे वातावरण निर्माण होत होते. विशेषतः लहान मुले, ज्येष्ठ नागरिक आणि सकाळ-संध्याकाळ फिरणाऱ्या नागरिकांना याचा त्रास सहन करावा लागत होता. या पार्श्वभूमीवर नगरपरिषदेने हाती घेतलेला हा उपक्रम महत्त्वपूर्ण मानला जात आहे.
ABC कार्यक्रमामुळे भटक्या कुत्र्यांची अनियंत्रित वाढ रोखण्यास मदत होणार असून भविष्यात या समस्येवर दीर्घकालीन नियंत्रण मिळविण्याचा मार्ग मोकळा होणार आहे. यासोबतच नागरिकांच्या सुरक्षिततेत वाढ होण्यासही मदत होईल, असा विश्वास नगरपरिषद प्रशासनाने व्यक्त केला आहे.
विशेष म्हणजे, या मोहिमेत प्राण्यांप्रती मानवीय दृष्टिकोन जपण्यात येत आहे. कुत्र्यांना कोणतीही इजा न पोहोचवता त्यांचे निर्बीजीकरण करून पुन्हा त्यांच्या परिसरात सोडण्यात येत असल्याची माहिती नगरपरिषदेकडून देण्यात आली आहे.
दरम्यान, नगरपरिषदेने नागरिकांना या मोहिमेस सहकार्य करण्याचे आवाहन केले आहे. शहरात भटके, आक्रमक किंवा नागरिकांसाठी धोकादायक ठरणारे कुत्रे आढळल्यास त्याची माहिती तात्काळ नगरपरिषदेला द्यावी, असे आवाहन करण्यात आले आहे. स्वच्छ, सुरक्षित आणि प्राणीहित जपणारे शहर निर्माण करण्याच्या दृष्टीने एरंडोल नगरपरिषदेचा हा उपक्रम महत्त्वाचा ठरत असून नागरिकांकडूनही या मोहिमेचे स्वागत केले जात आहे.
