पीएमएफएमई योजनेच्या अनुदानातून कमिशन उकळल्याचा आरोप; धुळ्यात ५० ते ६० महिलांची जिल्हाधिकारी कार्यालयावर धडक
प्रत्येकी २० हजार रुपये सक्तीने घेतल्याचा दावा; तिघांविरोधात गुन्हा दाखल करण्याची मागणी, न्याय न मिळाल्यास आंदोलनाचा इशारा
धुळे | प्रतिनिधी
धुळे जिल्ह्यात केंद्र सरकारच्या प्रधानमंत्री सूक्ष्म अन्न प्रक्रिया उद्योग उन्नयन (PMFME) योजनेअंतर्गत मिळणाऱ्या अनुदानाच्या रकमेतून महिलांकडून कथितरीत्या कमिशन उकळण्यात आल्याचा गंभीर आरोप समोर आला आहे. धुळे तालुक्यातील अजनाळे येथील सुमारे ५० ते ६० महिलांनी जिल्हाधिकारी कार्यालयावर धडक देत संबंधितांवर आर्थिक फसवणुकीचा आरोप केला असून, दोषींवर तातडीने गुन्हा दाखल करण्याची मागणी केली आहे.
महिलांच्या म्हणण्यानुसार, शेतकरी, कष्टकरी आणि विधवा महिलांना व्यवसाय उभारणीसाठी शासनाकडून ७० हजार रुपयांचे अनुदान बँक खात्यात जमा करण्यात येते. मात्र, या अनुदानातून प्रत्येकी २० हजार रुपये सक्तीने रोख स्वरूपात काढून घेतल्याचा आरोप करण्यात आला आहे.
तक्रारदार महिलांनी मनीष भोसले, अनुसया भोसले आणि विनोद पवार यांच्यावर गंभीर आरोप करत, त्यांनी महिलांची दिशाभूल करून तसेच दबाव टाकून ही रक्कम घेतल्याचा दावा केला आहे. ही रक्कम एका खाजगी कंपनीच्या नावाखाली कमिशन म्हणून वसूल करण्यात आल्याचेही महिलांनी निवेदनात नमूद केले आहे.
महिलांनी दिलेल्या माहितीनुसार, हा प्रकार केवळ अजनाळे गावापुरता मर्यादित नसून परिसरातील २७ ते २८ गावांमध्ये अशाच पद्धतीने अनेक लाभार्थ्यांकडून पैसे घेतल्याचा संशय आहे. त्यामुळे या कथित गैरव्यवहाराची व्याप्ती मोठी असू शकते, असा आरोप महिलांनी केला आहे.
जिल्हाधिकारी कार्यालयात निवेदन सादर करताना संतप्त महिलांनी संपूर्ण प्रकरणाची निष्पक्ष चौकशी करून संबंधितांवर फौजदारी गुन्हे दाखल करावेत, तसेच लाभार्थी महिलांना न्याय मिळवून द्यावा, अशी मागणी केली. प्रशासनाकडून वेळेत कारवाई न झाल्यास तीव्र आंदोलन छेडण्याचा इशाराही त्यांनी दिला.
दरम्यान, या प्रकरणातील आरोपांची अधिकृत चौकशी होणे बाकी असून संबंधित व्यक्तींची भूमिका अद्याप समोर आलेली नाही. त्यामुळे या आरोपांबाबत प्रशासनाच्या चौकशीनंतरच वस्तुस्थिती स्पष्ट होणार आहे.
