वेटलिफ्टिंग खेळाडूंसाठी विकसित बेल्टला केंद्र सरकारची मान्यता; डॉ. क्रांती क्षीरसागर यांच्या संशोधनाला पेटंट कार्यालयाची डिझाईन नोंदणी
भारत सरकारकडून नोंदणीकृत डिझाईन प्रमाणपत्र प्राप्त; क्रीडा विज्ञान व संशोधन क्षेत्रातील महत्त्वपूर्ण उपलब्धी
चोपडा | प्रतिनिधी (राहुल पाटील)
भारतीय क्रीडा संशोधन क्षेत्रासाठी अभिमानास्पद अशी उपलब्धी नोंदवत वेटलिफ्टिंग खेळाडूंसाठी विकसित करण्यात आलेल्या विशेष बेल्टच्या अभिनव डिझाईनला भारत सरकारच्या पेटंट कार्यालयाकडून (The Patent Office, Government of India) अधिकृत डिझाईन नोंदणी प्रमाणपत्र प्राप्त झाले आहे. संशोधक डॉ. क्रांती संदेश क्षीरसागर यांनी विकसित केलेल्या “Belt for Weightlifting Players” या डिझाईनची डिझाईन क्रमांक 483810-001 अंतर्गत नोंदणी करण्यात आली असून, या यशामुळे भारतीय क्रीडा विज्ञान आणि नवोपक्रम क्षेत्रात आणखी एक महत्त्वाचा टप्पा गाठण्यात आला आहे.
भारत सरकारच्या Designs Act, 2000 आणि Designs Rules, 2001 अंतर्गत या डिझाईनला कायदेशीर संरक्षण देण्यात आले आहे. या डिझाईनची नोंदणी १५ डिसेंबर २०२५ रोजी करण्यात आली होती, तर त्याचे अधिकृत नोंदणीकृत डिझाईन प्रमाणपत्र २५ जून २०२६ रोजी जारी करण्यात आले.
डॉ. क्रांती क्षीरसागर यांनी विकसित केलेला हा विशेष बेल्ट वेटलिफ्टिंग खेळाडूंच्या कंबरेला अधिक सक्षम आधार देण्यासाठी तयार करण्यात आला आहे. वजन उचलताना कंबरेवरील ताण कमी करणे, दुखापतींचा धोका कमी करणे आणि खेळाडूंची कामगिरी अधिक प्रभावी व सुरक्षित बनविणे हा या अभिनव डिझाईनचा मुख्य उद्देश आहे. त्यामुळे हा बेल्ट केवळ क्रीडा साहित्य नसून खेळाडूंच्या सुरक्षिततेसाठी उपयुक्त ठरणारा संशोधनाधारित नवोपक्रम मानला जात आहे.
क्रीडा विज्ञान, संशोधन आणि नावीन्यपूर्ण तंत्रज्ञानाच्या संगमातून विकसित झालेल्या या डिझाईनला मिळालेली केंद्र सरकारची मान्यता ही संशोधन क्षेत्रातील मोठी उपलब्धी मानली जात आहे. भविष्यात अशा संशोधनामुळे भारतीय खेळाडूंना अधिक सुरक्षित आणि दर्जेदार क्रीडा साहित्य उपलब्ध होण्यास मदत होणार असल्याचा विश्वास व्यक्त केला जात आहे.
या उल्लेखनीय यशाबद्दल महात्मा गांधी शिक्षण मंडळाचे अध्यक्ष ॲड. संदीप सुरेश पाटील, संस्थेच्या सचिव डॉ. स्मिता संदीप पाटील, प्राचार्या डॉ. संध्या सोनवणे, उपप्राचार्य, प्राध्यापक तसेच क्रीडा, शिक्षण आणि संशोधन क्षेत्रातील अनेक मान्यवरांनी डॉ. क्रांती संदेश क्षीरसागर यांचे अभिनंदन केले आहे.
या यशामुळे संशोधनाला प्रोत्साहन मिळण्याबरोबरच भारतीय क्रीडा क्षेत्रात स्वदेशी संशोधनावर आधारित आधुनिक उपकरणांच्या निर्मितीस नवी दिशा मिळेल, अशी भावना विविध स्तरांतून व्यक्त होत आहे.
