अनुसूचित जाती उपवर्गीकरणाविरोधात जळगावात महामोर्चाची तयारी; नियोजनासाठी ५९ जातींचा महामेळावा आज
उपवर्गीकरणाविरोधी संघर्ष समितीचे आवाहन; शानबाग सभागृहात प्रतिनिधींची बैठक
जगदिश सपकाळे जळगाव | प्रतिनिधी
अनुसूचित जाती (SC) आरक्षणातील उपवर्गीकरणाच्या प्रस्तावित प्रक्रियेविरोधात जळगावात भव्य महामोर्चा आयोजित करण्याच्या तयारीला वेग आला आहे. या महामोर्चाच्या नियोजनासाठी शनिवार, ८ ऑगस्ट २०२६ रोजी दुपारी २ वाजता प्रभात कॉलनी स्टॉप येथील शानबाग सभागृहात ५९ जातींच्या प्रतिनिधींचा महामेळावा आयोजित करण्यात आला आहे.
अनुसूचित जाती उपवर्गीकरण विरोधी संघर्ष समितीच्या वतीने आयोजित या मेळाव्यात महामोर्चाची रूपरेषा, नियोजन आणि पुढील आंदोलनाची दिशा निश्चित करण्यात येणार आहे. या बैठकीला ५९ जातींच्या प्रतिनिधींनी मोठ्या संख्येने उपस्थित राहून महामोर्चा यशस्वी करण्याचे आवाहन करण्यात आले आहे.
उपवर्गीकरणाविरोधातील प्रमुख भूमिका
संघर्ष समितीच्या मते, अनुसूचित जातींचे उपवर्गीकरण केल्यास संविधानातील समतेच्या तत्त्वावर परिणाम होण्याची शक्यता असून, अनुसूचित जाती समाजातील सामाजिक ऐक्याला धक्का बसू शकतो.
समितीने स्पष्ट केले की, हा मोर्चा कोणत्याही एका समाजाविरोधात नसून, मातंग समाजासह सर्व ५९ जातींचे ऐक्य अबाधित ठेवणे हा या आंदोलनाचा प्रमुख उद्देश आहे.
संघर्ष समितीने मांडलेले मुद्दे
-
अनुसूचित जातींमध्ये सामाजिक तेढ व मतभेद निर्माण होण्याची भीती.
-
आरक्षणाचा मूळ हेतू आणि अनुसूचित जातींचे एकसंध स्वरूप बाधित होण्याची शक्यता.
-
उपवर्गीकरणामागे राजकीय हेतू असल्याचा आरोप.
-
जातीनिहाय अधिकृत व विश्वासार्ह आकडेवारी उपलब्ध नसताना निर्णय घेणे अन्यायकारक असल्याचा दावा.
-
केवळ उपवर्गीकरणाऐवजी शिक्षण, रोजगार आणि प्रशासकीय बळकटीकरणावर भर देण्याची गरज.
संघर्ष समितीने शासनाने या मुद्द्यांची गांभीर्याने दखल घ्यावी आणि प्रस्तावित उपवर्गीकरणाचा पुनर्विचार करावा, अशी मागणी केली आहे.
मोठ्या सहभागाचे आवाहन
अनुसूचित जाती उपवर्गीकरण विरोधी संघर्ष समितीचे निमंत्रक मुकुंद भाऊ सपकाळे आणि राष्ट्रीय चर्मकार संघटनेचे राष्ट्रीय कार्याध्यक्ष भानुदास विसावे यांनी ५९ जातींच्या प्रतिनिधींनी मोठ्या संख्येने महामेळाव्यास उपस्थित राहून आगामी महामोर्चा यशस्वी करण्यासाठी सक्रिय सहभाग नोंदवावा, असे आवाहन केले आहे.
