‘गिरणेचे अतिरिक्त पाणी वाहून जाऊ देऊ नका; शेतकऱ्यांसाठी साठवा!’ – पालकमंत्री गुलाबराव पाटील
गिरणा धरण १०० टक्के भरले; एरंडोल, धरणगाव व अमळनेर तालुक्यात जलस्रोत पुनर्भरणाचे निर्देश
पाळधी/जळगाव, दि. ८ ऑगस्ट : प्रतिनिधी
गिरणा धरण पूर्ण क्षमतेने भरल्यानंतर नदीपात्रातून वाहून जाणाऱ्या अतिरिक्त पाण्याचा शेती आणि भविष्यातील पाणीटंचाईसाठी प्रभावी वापर करण्याचे निर्देश पाणीपुरवठा व स्वच्छता मंत्री तथा पालकमंत्री गुलाबराव पाटील यांनी जलसंपदा विभागाला दिले आहेत.
“गिरणा धरण पूर्ण क्षमतेने भरले आहे. आता अतिरिक्त पाणी केवळ वाहून जाऊ न देता त्याचा उपयोग बंधारे व जलस्रोतांच्या पुनर्भरणासाठी करा. आजचे अतिरिक्त पाणी उद्याच्या शेतकऱ्याच्या कामी आले पाहिजे,” असे निर्देश त्यांनी दिले.
गिरणा धरण दि. ८ ऑगस्ट रोजी १०० टक्के भरले असून, त्यातून अतिरिक्त पाण्याचा विसर्ग सुरू आहे. या पार्श्वभूमीवर पालकमंत्री पाटील यांनी जलसंपदा विभागाचे अधीक्षक अभियंता तसेच गिरणा पाटबंधारे विभागाचे कार्यकारी अभियंता विनोद पाटील यांच्याशी चर्चा करून अतिरिक्त पाण्याचे योग्य नियोजन करण्याच्या सूचना दिल्या.
एरंडोल, धरणगाव, अमळनेरला प्राधान्य
अतिरिक्त पाण्याचा जास्तीत जास्त उपयोग एरंडोल, धरणगाव आणि अमळनेर तालुक्यांतील लहान-मोठे बंधारे व जलस्रोतांच्या पुनर्भरणासाठी करण्यात यावा, असे निर्देश देण्यात आले आहेत.
यामुळे परिसरातील विहिरी, नाले आणि भूजलसाठ्यांची पाणीपातळी वाढण्यास मदत होणार असून, शेतीसह आगामी काळातील पिण्याच्या पाण्याची उपलब्धता सुधारण्याची अपेक्षा आहे.
निम्न गिरणा कालव्यात १०० क्युसेक्स पाणी
पालकमंत्र्यांच्या निर्देशानुसार जलसंपदा विभागाने गिरणा नदीवरील दहिगाव बंधाऱ्यातून निम्न गिरणा कालव्यात १०० क्युसेक्स पाणी सोडण्याचे नियोजन केले आहे. या माध्यमातून कालव्याच्या प्रभावक्षेत्रातील बंधारे आणि जलस्रोतांचे पुनर्भरण करण्यावर भर दिला जाणार असल्याचे कार्यकारी अभियंता विनोद पाटील यांनी सांगितले.
‘धरण भरल्यानंतर खरे नियोजन सुरू होते’
पालकमंत्री गुलाबराव पाटील म्हणाले, “धरण भरले म्हणजे पाण्याचे नियोजन संपले असे नाही; खरे नियोजन त्यानंतरच सुरू होते. पावसाळ्यातील अतिरिक्त पाण्याचा प्रत्येक शक्य थेंब अडवून तो शेतकरी आणि गावांच्या उपयोगात आणला, तर भविष्यातील पाणीटंचाईवर मात करण्यास मोठी मदत होईल.”
या पाणी पुनर्भरणाच्या नियोजनामुळे एरंडोल, धरणगाव आणि अमळनेर परिसरातील भूजलपातळी वाढण्यास तसेच शेती व पिण्याच्या पाण्याची उपलब्धता सुधारण्यास हातभार लागणार असल्याने शेतकरी व ग्रामस्थांमध्ये समाधान व्यक्त होत आहे.
