चिमुकल्या ‘पत्रकार’ मुलींच्या युक्तीला यश! खांडपे-कोंदिवडे रस्त्याच्या दुरुस्तीचे काम सुरू
छत्रीचा ‘माइक’, मोबाईलचा कॅमेरा; सोशल मीडियावरील व्हिडिओची प्रशासनाने घेतली दखल
कर्जत (रायगड) | प्रतिनिधी :
रायगड जिल्ह्यातील कर्जत तालुक्यातील खांडपे-कोंदिवडे रस्त्याच्या दुरवस्थेकडे प्रशासनाचे लक्ष वेधण्यासाठी चिमुकल्या विद्यार्थिनींनी केलेला अनोखा प्रयत्न अखेर यशस्वी ठरला आहे. रस्त्यावरील मोठमोठे खड्डे आणि त्यात साचणाऱ्या पावसाच्या पाण्यामुळे नागरिकांना होत असलेल्या त्रासाची ‘ग्राउंड रिपोर्ट’ तयार करून या मुलींनी सोशल मीडियाच्या माध्यमातून प्रशासनापर्यंत समस्या पोहोचवली. त्यानंतर आता या रस्त्याच्या दुरुस्तीचे प्रत्यक्ष काम सुरू झाले आहे.
खांडपे जिल्हा परिषद शाळेतील काही विद्यार्थिनींनी रस्त्याच्या समस्येकडे लक्ष वेधण्यासाठी चक्क पत्रकाराची भूमिका साकारली. हातात माइक नसल्याने एका छत्रीचा माइक म्हणून वापर करत त्यांनी मोबाईल कॅमेऱ्यासमोर रस्त्याची परिस्थिती मांडली. नेहा घारे हिने रिपोर्टरची भूमिका साकारली, तर मानसी पवार हिने कॅमेरा हाताळला.
मोबाईल, छत्री अन् समस्येचा बुलंद आवाज
रस्त्यावर पडलेले खड्डे, त्यात साचलेले पावसाचे पाणी आणि त्यामुळे दुचाकीस्वार, शाळकरी विद्यार्थी, ज्येष्ठ नागरिक व इतर प्रवाशांना होणाऱ्या त्रासाचे चित्रण या मुलींनी आपल्या व्हिडिओत केले. वृत्तवाहिनीच्या बातमीची हुबेहूब नक्कल करत त्यांनी तयार केलेला हा व्हिडिओ सोशल मीडियावर मोठ्या प्रमाणात प्रसारित झाला.
चिमुकल्या मुलींच्या कल्पकतेसोबतच त्यांनी उपस्थित केलेल्या रस्त्याच्या गंभीर प्रश्नाचीही सर्वत्र चर्चा झाली. त्यामुळे संबंधित प्रशासनाचे या समस्येकडे लक्ष वेधले गेले.
प्रशासनाकडून अखेर दुरुस्तीला सुरुवात
सोशल मीडियावरील व्हिडिओची दखल घेत संबंधित विभागाकडून खांडपे-कोंदिवडे रस्त्याच्या दुरुस्तीचे काम सुरू करण्यात आले आहे. रस्त्यावरील खड्डे बुजविण्याचे काम हाती घेण्यात आले असून, नागरिकांची गैरसोय टाळण्यासाठी दुरुस्तीचे काम लवकर पूर्ण करण्याच्या सूचना देण्यात आल्याचे सांगण्यात येत आहे.
चिमुकल्या विद्यार्थिनींनी कोणत्याही मोठ्या व्यासपीठाची किंवा महागड्या साधनांची अपेक्षा न करता एक छत्री, एक मोबाईल आणि आपल्या परिसरातील समस्येचा आवाज याच्या माध्यमातून प्रशासनाला जागे केले. त्यांच्या या अनोख्या पत्रकारितेचे आणि सामाजिक जाणीवेचे स्थानिकांकडून कौतुक होत आहे.
