जळगाव जिल्ह्यातील नगरपरिषद, नगरपंचायतींच्या कामकाजाचा आढावा; विकासकामांना गती देण्याचे निर्देश
‘नमो उद्यान’, माझी वसुंधरा, पीएम आवास व अमृत २.० योजनांच्या अंमलबजावणीवर भर
जळगाव | प्रतिनिधी हर्षल पाटील
जळगाव जिल्ह्यातील सर्व नगरपरिषदा आणि नगरपंचायतींच्या विविध विकासकामांचा व योजनांच्या अंमलबजावणीचा आढावा घेण्यासाठी जिल्हाधिकारी कार्यालयात १२ ऑगस्ट रोजी मुख्याधिकाऱ्यांची आढावा बैठक घेण्यात आली. जिल्हाधिकाऱ्यांच्या अध्यक्षतेखाली झालेल्या या बैठकीत नागरी सुविधा, महसूल वसुली, स्वच्छता, पर्यावरण संवर्धन तसेच विविध शासकीय योजनांच्या प्रगतीचा सविस्तर आढावा घेण्यात आला.
‘माझी वसुंधरा’ अभियानाच्या प्रभावी अंमलबजावणीवर भर
बैठकीत ‘माझी वसुंधरा अभियान ४.०’ अंतर्गत पर्यावरण संवर्धनासाठी विविध उपक्रम प्रभावीपणे राबविण्याच्या सूचना देण्यात आल्या. तसेच नगरपरिषद व नगरपंचायत क्षेत्रात ‘नमो उद्यान’ विकसित करण्याच्या नियोजनावरही चर्चा करण्यात आली.
पीएम आवास व अमृत २.० योजनांचा आढावा
प्रधानमंत्री आवास योजना (PMAY) १.० व २.० अंतर्गत सुरू असलेल्या घरकुल कामांची सद्यस्थिती तपासण्यात आली. त्याचबरोबर अमृत २.० योजना, पाणीपुरवठा व्यवस्था आणि राज्य नगरोत्थान योजनेअंतर्गत सुरू असलेल्या पायाभूत सुविधांच्या कामांना गती देण्याचे निर्देश देण्यात आले.
दिव्यांगांसाठी राखीव निधीचा योग्य वापर करण्याच्या सूचना
नगरपरिषद व नगरपंचायतींनी दिव्यांग कल्याणासाठी राखीव असलेल्या ५ टक्के निधीची योग्य तरतूद करून त्याचा प्रभावी वापर करावा, अशा सूचना बैठकीत देण्यात आल्या. यासोबतच जिल्हा नियोजन समितीअंतर्गत कामे, सौरऊर्जा प्रकल्प आणि ICT आधारित स्कॅनिंगच्या प्रगतीचाही आढावा घेण्यात आला.
न्यायालयीन प्रकरणे वेळेत निकाली काढण्याचे निर्देश
न्यायालयीन प्रकरणांमध्ये आवश्यक शपथपत्रे वेळेत दाखल करणे तसेच न्यायालयाच्या आदेशांची तातडीने अंमलबजावणी करण्याच्या सूचना मुख्याधिकाऱ्यांना देण्यात आल्या.
विकासकामे गुणवत्तेसह वेळेत पूर्ण करण्यावर भर
शहरांमधील नागरी सुविधा अधिक सक्षम करणे, सुरू असलेल्या विकासकामांना गती देणे आणि पर्यावरणपूरक उपक्रमांची प्रभावी अंमलबजावणी करणे यावर जिल्हाधिकाऱ्यांनी विशेष भर दिला. सर्व मुख्याधिकाऱ्यांनी आपल्या कार्यक्षेत्रातील कामे वेळेत, गुणवत्तेसह आणि नियोजनबद्ध पद्धतीने पूर्ण करावीत, असे निर्देश यावेळी देण्यात आले.
