गावकऱ्यांचा सक्रिय सहभाग लाभला तर सातपुड्याचे हरवलेले गतवैभव पुन्हा मिळविता येईल : जिल्हाधिकारी
निमड्या येथे जळगाव जिल्ह्यातील पहिल्या वृक्षलागवड प्रयोगाचा शुभारंभ; वनसंवर्धनासोबत ग्रामीण व आदिवासी भागात रोजगारनिर्मितीवर भर
रावेर | प्रतिनिधी : गावकऱ्यांनी वनसंवर्धनाच्या उपक्रमांमध्ये सक्रिय सहभाग घेतला, तर सातपुड्याचे हरवलेले गतवैभव पुन्हा मिळविता येईल, असा विश्वास जळगावचे जिल्हाधिकारी यांनी व्यक्त केला. स्वातंत्र्यदिनाच्या शासकीय कार्यक्रमानंतर सामूहिक वन हक्क क्षेत्र योजना (CFR) आणि विकसित भारत आजीविका रोजगार मिशन (ग्रामीण) अंतर्गत ग्रामीण भागात रोजगाराच्या विविध संधी निर्माण करण्याच्या उद्देशाने जळगाव जिल्ह्यातील पहिल्या वृक्षलागवड प्रयोगाचा शुभारंभ १५ ऑगस्ट रोजी निमड्या, ता. रावेर येथे जिल्हाधिकाऱ्यांच्या हस्ते करण्यात आला.
या उपक्रमाच्या माध्यमातून वनसंवर्धनासोबतच ग्रामीण व आदिवासी भागातील नागरिकांसाठी शाश्वत रोजगाराच्या संधी निर्माण करण्यावर भर देण्यात येत आहे. वृक्षलागवड, वृक्षांचे संगोपन आणि वनक्षेत्राचे संवर्धन यामुळे पर्यावरणाचे संरक्षण होण्यासोबतच स्थानिक पातळीवर रोजगाराची साधने उपलब्ध होणार आहेत.
वनहक्काच्या माध्यमातून विविध उपक्रमांना चालना
यावेळी जिल्हाधिकारी यांनी सांगितले की, आदिवासी बांधवांचे जीवन जंगल आणि वनोपजाशी घट्ट जोडलेले आहे. सामूहिक वनहक्क तसेच वैयक्तिक वनहक्कांच्या माध्यमातून गावाच्या लोकसंख्येच्या प्रमाणात विविध उपक्रम राबविता येणार आहेत. या उपक्रमांमुळे वनसंवर्धनाला मोठी चालना मिळण्यासोबतच स्थानिक नागरिकांच्या आर्थिक उत्पन्नातही वाढ होण्यास मदत होईल.
“गावकऱ्यांनी शासनाच्या योजनांचा जास्तीत जास्त लाभ घेऊन आपल्या गावासोबतच परिसरातील जंगलाचे संवर्धन करावे. गावकऱ्यांचा सक्रिय सहभाग लाभला, तर सातपुड्याचे हरवलेले गतवैभव पुन्हा मिळविता येईल,” असा विश्वास जिल्हाधिकारी यांनी व्यक्त केला.
ग्रामस्थांचा सहभाग; वृक्षसंवर्धनाचा संकल्प
वन हक्क समितीच्या सदस्यांनी शासनाच्या या उपक्रमाचे स्वागत केले. केवळ वृक्षलागवड करून न थांबता लागवड केलेल्या वृक्षांचे संगोपन व संवर्धन करण्याची ग्वाही समितीच्या सदस्यांनी दिली.
वनसंवर्धनाच्या माध्यमातून वर्षभर रोजगाराच्या नव्या संधी उपलब्ध करून देणाऱ्या या उपक्रमामुळे पर्यावरण संवर्धन, स्थानिक रोजगारनिर्मिती आणि ग्रामीण विकास या तिन्ही बाबींना एकाच वेळी चालना मिळण्याची अपेक्षा व्यक्त करण्यात आली.
मान्यवरांची उपस्थिती
या उपक्रमास यावल वन विभागाचे उपवनसंरक्षक, उपजिल्हाधिकारी (रोहयो), प्रकल्प अधिकारी, यावल, तहसीलदार रावेर, नायब तहसीलदार, वनपरिक्षेत्र अधिकारी यांच्यासह निमड्या येथील सरपंच, ग्रामपंचायत सदस्य, पदाधिकारी आणि ग्रामस्थ मोठ्या संख्येने उपस्थित होते.
सातपुडा परिसरातील वनसंपदा जपतानाच स्थानिक नागरिकांना रोजगाराच्या संधी उपलब्ध करून देण्यासाठी हा उपक्रम महत्त्वाचा ठरणार असून, ग्रामस्थांच्या सहभागातून तो अधिक प्रभावीपणे राबविण्याचे आवाहन यावेळी करण्यात आले.
