पाचोऱ्यात आदिवासी हक्क अधिकार परिषदेच्या नियोजनासाठी वंचित बहुजन आघाडीची बैठक
१२ सप्टेंबर रोजी पाचोऱ्यात परिषद; जाहीर सभेच्या आयोजनासह विविध विषयांवर पदाधिकाऱ्यांची सविस्तर चर्चा
पाचोरा | प्रतिनिधी :
वंचित बहुजन आघाडीच्या वतीने आगामी आदिवासी हक्क अधिकार परिषद आयोजित करण्याच्या पार्श्वभूमीवर पाचोरा येथे पदाधिकारी व कार्यकर्त्यांची महत्त्वपूर्ण बैठक घेण्यात आली. येत्या १२ सप्टेंबर रोजी पाचोरा येथे वंचित बहुजन आघाडी प्रणित एकलव्य वंचित आघाडीच्या संयुक्त विद्यमाने आदिवासी हक्क अधिकार परिषदेचे आयोजन करण्यात येणार असून, या परिषदेच्या नियोजनाबाबत बैठकीत सविस्तर चर्चा करण्यात आली.
बैठकीला वंचित बहुजन आघाडीचे जिल्हाध्यक्ष ईश्वर पाटील (लाला सर) यांची प्रमुख उपस्थिती होती. यावेळी जिल्ह्यातील संघटनात्मक बांधणी, आदिवासी समाजाचे हक्क व अधिकार तसेच परिषद यशस्वी करण्यासाठी करावयाच्या नियोजनावर पदाधिकाऱ्यांनी विचारविनिमय केला.
यावेळी जिल्ह्याचे उपाध्यक्ष हरिश्चंद्र सोनवणे, जिल्हा सचिव प्रा. प्रीतीलाल पवार, जिल्हा उपाध्यक्ष अनिल लोंढे, जिल्हा महासचिव अमित तडवी, पाचोरा तालुकाध्यक्ष संदीप जाधव, चाळीसगाव तालुकाध्यक्ष संदीप कांबळे, पाचोरा तालुका महासचिव असलम तडवी, महासचिव अमोल अहिरे, तालुका उपाध्यक्ष मनोज अहिरे यांच्यासह पदाधिकारी व कार्यकर्ते उपस्थित होते.
आदिवासी हक्कांच्या प्रश्नांवर होणार चर्चा
आदिवासी समाजाच्या विविध प्रलंबित प्रश्नांना वाचा फोडण्यासाठी आणि त्यांच्या हक्क-अधिकारांबाबत जनजागृती करण्यासाठी १२ सप्टेंबर रोजी आयोजित करण्यात येणाऱ्या परिषदेला मोठ्या संख्येने नागरिकांनी उपस्थित राहावे, यासाठी व्यापक नियोजन करण्याचे बैठकीत ठरविण्यात आले. परिषदेसाठी गावपातळीवर संपर्क मोहीम राबविणे, कार्यकर्त्यांची जबाबदारी निश्चित करणे तसेच कार्यक्रमाच्या आयोजनाबाबत आवश्यक तयारी करण्यावर चर्चा झाली.
याशिवाय वंचित बहुजन आघाडीचे ज्येष्ठ नेते ॲड. बाळासाहेब आंबेडकर यांच्या जाहीर सभेच्या आयोजनाच्या संदर्भातही बैठकीत चर्चा झाल्याचे पदाधिकाऱ्यांनी सांगितले. आगामी काळातील संघटनात्मक कार्यक्रम आणि पक्षाच्या भूमिकेबाबतही उपस्थित कार्यकर्त्यांना मार्गदर्शन करण्यात आले.
बैठकीत पाचोरा व परिसरातील आदिवासी समाजाच्या प्रश्नांवर संघटितपणे आवाज उठविण्याची आवश्यकता व्यक्त करण्यात आली. परिषदेला यशस्वी करण्यासाठी सर्व पदाधिकारी आणि कार्यकर्त्यांनी एकजुटीने काम करण्याचे आवाहन करण्यात आले.
यावेळी ऋषिकेश तायडे, शाहरुख तडवी, अझरुद्दीन तडवी, अयोदिन तडवी यांच्यासह वंचित बहुजन आघाडीचे पदाधिकारी आणि कार्यकर्ते मोठ्या संख्येने उपस्थित होते. बैठकीच्या शेवटी पाचोरा तालुकाध्यक्ष संदीप जाधव यांनी उपस्थितांचे आभार मानले. त्यानंतर बैठकीची सांगता करण्यात आली.
