उज्जैनला गेले कुटुंब अन् चोरट्यांचा घरावर डल्ला; २४ तासांत दोघे जेरबंद
रामेश्वर कॉलनीतील ३१ लाखांच्या घरफोडीचा एमआयडीसी पोलिसांकडून छडा; २०८ ग्रॅम सोने व २८ ग्रॅम चांदी हस्तगत
जळगाव :
कुटुंबीय उज्जैन येथे दर्शनासाठी गेले असल्याची संधी साधून रामेश्वर कॉलनीतील बंद घराचे कुलूप तोडून लाखो रुपयांचे दागिने लंपास करणाऱ्या दोन आरोपींना एमआयडीसी पोलिसांनी अवघ्या २४ तासांत जेरबंद केले. पोलिसांनी आरोपींकडून ३१ लाख २६ हजार ८०० रुपये किमतीचे २०८ ग्रॅम सोन्याचे दागिने आणि २८ ग्रॅम चांदीचे दागिने हस्तगत केले आहेत.
गंभीर घरफोडीच्या गुन्ह्याचा जलदगतीने तपास करून मोठ्या प्रमाणातील चोरीचा मुद्देमाल हस्तगत करण्यात पोलिसांना यश आले आहे.
कुटुंब उज्जैनला, चोरट्यांनी साधली संधी
रामेश्वर कॉलनीतील रहिवासी संगीता घुगे या कुटुंबासह उज्जैन, मध्य प्रदेश येथे दर्शनासाठी गेल्या होत्या. घर बंद असल्याची संधी साधून अज्ञात चोरट्यांनी २७ ऑगस्ट रोजी रात्री ३.३० ते २८ ऑगस्ट रोजी रात्री ३.३० या कालावधीत घराच्या दरवाज्याची कडी-कॉयंडा तोडून आत प्रवेश केला.
चोरट्यांनी घरातील सोन्याचे दागिने आणि रोख रक्कम लंपास केली. घुगे कुटुंबीय परतल्यानंतर घरफोडी झाल्याचे उघडकीस आले. याप्रकरणी एमआयडीसी पोलीस ठाण्यात गुन्हा क्रमांक ६९७/२०२६ दाखल करण्यात आला. भारतीय न्याय संहितेच्या कलम ३०५(ए), ३३१(३) आणि ३३१(४) अन्वये गुन्हा नोंदविण्यात आला.
सीसीटीव्ही, तांत्रिक तपास अन् गोपनीय माहितीने आरोपींपर्यंत पोहोचले पोलीस
गुन्ह्याचे गांभीर्य लक्षात घेऊन पोलीस अधीक्षक श्रीकांत धिवरे यांनी एमआयडीसी पोलीस ठाण्याचे प्रभारी अधिकारी पोलीस निरीक्षक बबन आव्हाड यांना आरोपींचा शोध घेऊन चोरीचा मुद्देमाल हस्तगत करण्याच्या सूचना दिल्या.
त्यानुसार पोलीस निरीक्षक बबन आव्हाड यांच्या मार्गदर्शनाखाली पोलीस उपनिरीक्षक चंद्रकांत धनके यांच्या नेतृत्वाखाली विशेष पथक तयार करण्यात आले. पथकाने घटनास्थळाची बारकाईने पाहणी करून महत्त्वाचे पुरावे संकलित केले. परिसरातील सीसीटीव्ही फुटेज, तांत्रिक तपास आणि गोपनीय माहितीच्या आधारे संशयितांचा शोध घेण्यात आला.
तपासाची चक्रे वेगाने फिरल्यानंतर पोलिसांनी विशाल मुरलीधर दाभाडे (वय २५, व्यवसाय मजुरी) आणि जितेंद्र मुरलीधर दाभाडे (वय २७), दोघेही रा. सप्तश्रृंगी माता मंदिराजवळ, रामेश्वर कॉलनी, जळगाव, यांना ताब्यात घेतले.
चौकशीत धागा मिळताच लाखोंचा मुद्देमाल जप्त
दोन्ही संशयितांकडे कसून चौकशी केल्यानंतर घरफोडीच्या गुन्ह्याबाबत महत्त्वाची माहिती समोर आली. त्यानंतर त्यांच्या ताब्यातून चोरीस गेलेले सोन्या-चांदीचे दागिने हस्तगत करण्यात आले.
जप्त मुद्देमालात सोन्याचे गंठन, मिनी पाटली, फॅन्सी शॉर्ट पाटली, काळेमणी पाटली, टॉप्स, विविध डिझाइनच्या अंगठ्या, नथ तसेच चांदीचे जोडवे यांचा समावेश आहे.
पोलिसांनी एकूण ३१ लाख २६ हजार ८०० रुपये किमतीचे २०८ ग्रॅम सोने आणि २८ ग्रॅम चांदी हस्तगत केली आहे.
वरिष्ठांच्या मार्गदर्शनाखाली पथकाची उल्लेखनीय कामगिरी
ही कारवाई पोलीस अधीक्षक श्रीकांत धिवरे, अपर पोलीस अधीक्षक संदीप गावीत आणि जळगाव उपविभागाचे उपविभागीय पोलीस अधिकारी नितीन गणापुरे यांच्या मार्गदर्शनाखाली करण्यात आली.
एमआयडीसी पोलीस ठाण्याचे वरिष्ठ पोलीस निरीक्षक बबन आव्हाड यांच्या नेतृत्वाखाली पोलीस उपनिरीक्षक चंद्रकांत धनके, ग्रेड पोलीस उपनिरीक्षक विजयसिंग पाटील, पोलीस हेड कॉन्स्टेबल रामकृष्ण पाटील, रमेश चौधरी, किरण चौधरी, पोलीस नाईक प्रदीप चौधरी, तसेच पोलीस कॉन्स्टेबल रमाकांत साळुंखे, नितीन ठाकूर, राहुल घेटे, गणेश टेकर, किरण पाटील, शशिकांत मराठ, ललित नारखेडे, विशाल कोळी, योगी घुगे आणि सुभाष साबळे यांनी कारवाईत महत्त्वाची भूमिका बजावली.
