गणपती दर्शनानिमित्त आमदार मंगेश चव्हाण यांची मुकेश पाटील यांनी घेतली सदिच्छा भेट
अयोध्येतील श्रीराम मंदिराच्या धर्तीवरील भव्य देखाव्याने चाळीसगावात वेधले भाविकांचे लक्ष
धरणगाव | प्रतिनिधी : गणेशोत्सवाच्या पावन पर्वानिमित्त चाळीसगाव नगरी भक्तिमय वातावरणात न्हाऊन निघाली असताना, बाभळे गावाचे सुपुत्र तथा युवा समाजसेवक श्री. मुकेश पाटील यांनी चाळीसगाव येथे गणपती दर्शन घेत आमदार मंगेशदादा चव्हाण यांची सदिच्छा भेट घेतली. गणेशोत्सवाच्या पार्श्वभूमीवर झालेल्या या भेटीमुळे परिसरातील कार्यकर्त्यांमध्ये उत्साहाचे वातावरण पाहायला मिळाले.
चाळीसगाव येथील प्रसिद्ध गणेश मंडळाच्या भव्य देखाव्यासमोर ही सदिच्छा भेट झाली. यंदा मंडळाने अयोध्येतील श्रीराम मंदिराच्या धर्तीवर भव्य देखावा उभारला आहे. आकर्षक विद्युत रोषणाईने सजलेला हा देखावा भाविकांचे विशेष आकर्षण ठरत असून, दर्शनासाठी नागरिकांची मोठी गर्दी होत आहे.
याच भक्तिमय वातावरणात मुकेश पाटील आणि आमदार मंगेशदादा चव्हाण यांच्यात आपुलकीने संवाद झाला. यावेळी गणेशोत्सवाचे आयोजन, सामाजिक उपक्रम तसेच परिसरातील विविध विषयांवर चर्चा झाल्याचे सांगण्यात आले.
बाभळे गावाशी कायम जपली नाळ
मूळचे बाभळे गावचे असलेले मुकेश पाटील हे सध्या समाजसेवेत सक्रिय असून, आपल्या गावाशी असलेली नाळ त्यांनी कायम जपली आहे. गावाच्या विकासासाठी विविध विषयांवर ते सातत्याने पाठपुरावा करीत असल्याचे सांगण्यात येते. आमदार मंगेशदादा चव्हाण आणि मुकेश पाटील यांच्यातील स्नेहपूर्ण संबंधही परिसरात परिचित आहेत.
भेटीदरम्यान बाभळे गाव व परिसरातील विकासकामे, आगामी सामाजिक उपक्रम तसेच गणेशोत्सवाच्या नियोजनाबाबत चर्चा झाल्याचे समजते. आमदार मंगेशदादा चव्हाण यांनी मुकेश पाटील यांचे गणपती दर्शनासाठी स्वागत करून त्यांना गणेशोत्सवाच्या शुभेच्छा दिल्या.
यावेळी स्थानिक कार्यकर्ते, पदाधिकारी व ग्रामस्थ मोठ्या संख्येने उपस्थित होते. गणपती बाप्पाच्या दर्शनासोबतच झालेल्या या सदिच्छा भेटीमुळे उपस्थितांमध्ये उत्साहाचे वातावरण निर्माण झाले. ‘गणपती बाप्पा मोरया’च्या जयघोषात भेटीचा समारोप करण्यात आला.
