काकडदा आश्रमशाळेच्या मुलींची कबड्डीत विजयी भरारी

जिल्हास्तरीय स्पर्धेत ३७ गुणांनी दणदणीत विजय; विभागीय स्तरावर करणार नंदुरबार जिल्ह्याचे नेतृत्व

धडगाव/तालुका प्रतिनिधी : नंदुरबार क्रीडा संकुल येथे नुकत्याच पार पडलेल्या जिल्हास्तरीय शालेय कबड्डी स्पर्धेत शासकीय माध्यमिक आश्रमशाळा, काकडदा, ता. धडगाव येथील १७ वर्षांखालील मुलींच्या संघाने जिल्हास्तरीय विजेतेपद पटकावत उल्लेखनीय कामगिरी केली. या विजयानंतर काकडदा आश्रमशाळेचा संघ आता विभागीय स्तरावरील स्पर्धेत नंदुरबार जिल्ह्याचे प्रतिनिधित्व करणार आहे.

स्पर्धेच्या सुरुवातीपासूनच काकडदा आश्रमशाळेच्या मुलींनी उत्कृष्ट सांघिक खेळाचे प्रदर्शन करत प्रतिस्पर्धी संघांवर मात केली. उपांत्य फेरीतील दमदार कामगिरीनंतर संघाने अंतिम सामन्यात प्रवेश केला. अंतिम सामन्यातही मुलींनी सुरुवातीपासून आक्रमक आणि नियोजनबद्ध खेळ करत प्रतिस्पर्धी संघावर ५०-१३ असा ३७ गुणांच्या फरकाने दणदणीत विजय मिळविला.

या सामन्यात काकडदा संघातील खेळाडूंनी चपळता, आत्मविश्वास, शिस्त आणि जिद्दीचे उत्कृष्ट दर्शन घडविले. बचाव आणि आक्रमण यांचा योग्य समन्वय साधत मुलींनी सामन्यावर सुरुवातीपासूनच वर्चस्व राखले. त्यांच्या दमदार खेळामुळे प्रतिस्पर्धी संघाला सामन्यात पुनरागमनाची संधीच मिळाली नाही.

या यशामागे खेळाडूंची कठोर मेहनत, नियमित सराव, सांघिक भावना आणि जिंकण्याची जिद्द महत्त्वपूर्ण ठरली. तसेच क्रीडा शिक्षक शैलेंद्र वळवी यांच्या नियोजनबद्ध प्रशिक्षण व मार्गदर्शनाचा संघाला मोठा फायदा झाला. शाळेचे मुख्याध्यापक, अधीक्षक-अधीक्षिका, वर्गशिक्षक, शिक्षक आणि शिक्षकेतर कर्मचारी यांनी खेळाडूंना सातत्याने प्रोत्साहन, मार्गदर्शन आणि आवश्यक सहकार्य दिले.

या विजेतेपदामुळे काकडदा शासकीय माध्यमिक आश्रमशाळेच्या शिरपेचात आणखी एक मानाचा तुरा खोवला गेला आहे. आता विभागीय स्तरावर नंदुरबार जिल्ह्याचे नेतृत्व करण्याची संधी या संघाला मिळाली असून, आगामी स्पर्धेसाठी खेळाडूंमध्ये उत्साहाचे वातावरण आहे.

विजेत्या संघातील खेळाडू : गीता ठाकरे, सोनाली पाडवी, प्रियंका पाडवी, ललिता वळवी, अनिता वळवी, रतिला वळवी, नेहा शेमले, जयश्री पाडवी, रविना वळवी, राधा पटले, आरुषी वळवी आणि निशा वळवी.

या उल्लेखनीय यशाबद्दल विजेत्या कबड्डी संघातील सर्व खेळाडू, क्रीडा शिक्षक, मुख्याध्यापक, अधीक्षक-अधीक्षिका तसेच संपूर्ण शिक्षक व कर्मचारीवर्गाचे विविध स्तरांतून अभिनंदन होत आहे.

“मेहनत, शिस्त, संघभावना आणि योग्य मार्गदर्शनाच्या जोरावर काकडदा आश्रमशाळेच्या मुलींनी कबड्डीत जिल्हास्तरावर उत्कृष्ट कामगिरी करत शाळेचा नावलौकिक उंचावला आहे. विभागीय स्तरावरही त्या अशीच दमदार कामगिरी करतील,” असा विश्वास यावेळी व्यक्त करण्यात आला.