नवागढ अतिक्षेत्रात पर्युषण पर्वानिमित्त श्री १००८ नेमिनाथ भगवानांचा अभिषेक
विधिवत पूजन व आरती; भाविकांच्या सहभागाने मंदिर परिसर भक्तिमय
नवागढ : (परभणी प्रतिनिधी – रामचंद्र अन्नदाते) – श्री १००८ नेमिनाथ भगवान अतिक्षेत्र, नवागढ येथे पर्युषण पर्व मोठ्या भक्तिभावाने साजरे करण्यात येत आहे. पर्वानिमित्त मंदिरात श्री १००८ नेमिनाथ भगवानांचा विधिवत अभिषेक, पूजन व आरती करण्यात आली. या धार्मिक कार्यक्रमात भाविकांनी मोठ्या श्रद्धेने सहभाग घेतला.
अभिषेक व पूजनाच्या वेळी मंदिर परिसरात भक्तिमय वातावरण निर्माण झाले होते. भाविकांनी भगवान नेमिनाथ यांच्या चरणी श्रद्धापूर्वक नतमस्तक होत सुख, शांती व समृद्धीसाठी प्रार्थना केली. पर्युषण पर्वाच्या निमित्ताने संयम, अहिंसा, आत्मशुद्धी आणि सदाचाराचा संदेश भाविकांपर्यंत पोहोचविण्यात आला.
पर्युषण पर्व हे आत्मचिंतन, संयम आणि आध्यात्मिक साधनेला महत्त्व देणारे पर्व मानले जाते. या काळात धार्मिक विधींसोबतच आत्मपरीक्षण व सद्विचारांना प्राधान्य दिले जाते. त्याच भावनेतून नवागढ अतिक्षेत्रात विविध धार्मिक कार्यक्रमांचे आयोजन करण्यात येत आहे.
मंदिरातील आकर्षक काचकाम, सुबक धार्मिक सजावट आणि प्रसन्न वातावरणामुळे परिसराचे सौंदर्य अधिक खुलून दिसत होते. अभिषेक व पूजनासाठी उपस्थित भाविकांमध्ये विशेष उत्साह दिसून आला.
पर्युषण पर्वानिमित्त नवागढ येथील श्री १००८ नेमिनाथ भगवान अतिक्षेत्रात धार्मिक आणि आध्यात्मिक वातावरण निर्माण झाले असून, भाविकांकडून विविध धार्मिक उपक्रमांमध्ये उत्स्फूर्त सहभाग नोंदविला जात आहे.
