जेतवन बुद्ध विहारात वर्षावास प्रवचन मालिकेचे तेरावे पुष्प संपन्न
‘चार ब्रह्मविहार’ विषयावर रविंद्र वानखेडे गुरुजींचे सखोल मार्गदर्शन; बौद्ध उपासक-उपासिकांची मोठी उपस्थिती
जळगाव प्रतिनिधी :
भारतीय बौद्ध महासभा, जळगाव पूर्व अंतर्गत जळगाव तालुक्याच्या वतीने आयोजित राष्ट्रीय वर्षावास धम्म प्रवचन मालिकेचे तेरावे पुष्प जळगाव येथील अजिंठा हौसिंग सोसायटी परिसरातील जेतवन बुद्ध विहारात उत्साहपूर्ण व मंगलमय वातावरणात संपन्न झाले.
यावेळी आयु. रविंद्र एन. वानखेडे गुरुजी (केंद्रीय शिक्षक तथा जिल्हा उपाध्यक्ष, भारतीय बौद्ध महासभा, जळगाव पूर्व) यांनी ‘चार ब्रह्मविहार’ या विषयावर उपस्थितांना सखोल मार्गदर्शन केले.
आपल्या मार्गदर्शनात त्यांनी मैत्री, करुणा, मुदिता आणि उपेक्षा या चार ब्रह्मविहारांचे महत्त्व स्पष्ट केले. दैनंदिन जीवनातील विविध उदाहरणांच्या माध्यमातून या चारही भावनांचा मानवी जीवनाशी असलेला संबंध त्यांनी उलगडून सांगितला. मैत्रीभाव, करुणा, दुसऱ्याच्या आनंदात आनंद मानण्याची वृत्ती आणि समत्वभाव यांचा जीवनात अंगीकार केल्यास व्यक्तिमत्त्व अधिक समृद्ध होण्यास मदत होते, असे मार्गदर्शन यावेळी करण्यात आले.
मान्यवरांची उपस्थिती
कार्यक्रमाला मार्गदर्शक गुरुवर्य आद. बी. एस. पवार गुरुजी (जिल्हा संघटक) यांच्यासह आयु. आर. एम. सूर्यवंशी (माजी तालुकाध्यक्ष, मलकापूर), आयु. खराटे (बौद्धाचार्य, नांदुरा), आयु. बाबुराव वाघ, आयु. तासखेडकर, आयु. अशोक सैंदाणे, तसेच आद. ज्योतीताई भालेराव (केंद्रीय शिक्षिका) आणि आद. सुषमाताई इंगळे (जिल्हा कार्यकारिणी सचिव) आदी मान्यवर उपस्थित होते.
याशिवाय परिसरातील मोठ्या संख्येने श्रद्धाशील व धम्मनिष्ठ बौद्ध उपासक-उपासिका कार्यक्रमाला उपस्थित होते.
सूत्रसंचालन व आभार
कार्यक्रमाचे सूत्रसंचालन आयु. राजेश इंगळे यांनी केले, तर आद. ज्योतीताई भालेराव यांनी उपस्थितांचे आभार मानले.
या मंगल प्रसंगी उपस्थित उपासक-उपासिकांसाठी सुजाता महिला संघाच्या वतीने खीरदान करण्यात आले. त्यामुळे कार्यक्रमाला सामाजिक व बंधुभावाचा विशेष स्पर्श लाभला.
राष्ट्रीय वर्षावास धम्म प्रवचन मालिकेतील तेरावे पुष्प जेतवन बुद्ध विहारात उत्साहात संपन्न झाल्याने परिसरात धम्ममय वातावरण निर्माण झाले होते.
