अल्पवयीन मुलीच्या छेडछाड प्रकरणी पॉक्सोसह ॲट्रॉसिटीचा गुन्हा दाखल!
पाठलाग करून सोशल मीडियावर बनावट फोटो व स्टेटस ठेवल्याचा आरोप; २२ वर्षीय तरुणाविरुद्ध विविध कलमांन्वये कारवाई
पारोळा/सुरेश पाटोळे (प्रतिनिधी) : पारोळा तालुक्यातील पिंप्री परिसरात १५ वर्षीय अल्पवयीन मुलीचा पाठलाग करून छेडछाड केल्याचा तसेच सोशल मीडियावर तिचा बनावट फोटो तयार करून स्टेटसवर प्रसारित केल्याचा आरोप करत एका २२ वर्षीय तरुणाविरुद्ध पारोळा पोलीस ठाण्यात भारतीय न्याय संहिता (BNS), पॉक्सो कायदा आणि अनुसूचित जाती-जमाती अत्याचार प्रतिबंधक कायद्यान्वये गुन्हा दाखल करण्यात आला आहे.
पोलिसांत दाखल तक्रारीनुसार, सुमारे महिनाभरापूर्वी संबंधित अल्पवयीन विद्यार्थिनी शाळेतून पायी घरी जात असताना बोरी नदीच्या पुलाजवळ आरोपीने तिचा पाठलाग करून रस्ता अडविल्याचा आणि अश्लील स्वरूपाचे वक्तव्य केल्याचा आरोप आहे. या प्रकारानंतर मुलीने घरी जाऊन पालकांना घटनेची माहिती दिल्याचे तक्रारीत नमूद आहे.
इन्स्टाग्रामवर बनावट फोटो ठेवल्याचा आरोप
दरम्यान, २६ सप्टेंबर २०२६ रोजी गावातील एका व्यक्तीने मुलीच्या पालकांना संबंधित तरुणाने इन्स्टाग्रामवर मुलीचा आणि स्वतःचा बनावट फोटो तयार करून स्टेटसवर ठेवल्याची माहिती दिल्याचे तक्रारीत म्हटले आहे. या प्रकारामुळे बदनामी करण्याचा प्रयत्न झाल्याचा आरोप करण्यात आला आहे.
यानंतर मुलीने पालकांसह पारोळा पोलीस ठाण्यात धाव घेतली. या प्रकरणी गुन्हा क्रमांक ०३५९/२०२६ नोंदविण्यात आल्याचे पोलिस तक्रारीत नमूद आहे.
विविध कायद्यांन्वये गुन्हा
पोलिसांनी दाखल केलेल्या गुन्ह्यात BNS कलम ७८, तसेच POCSO कायदा कलम १२ आणि अनुसूचित जाती-जमाती अत्याचार प्रतिबंधक कायद्यातील संबंधित कलमांचा समावेश असल्याचे तक्रारीच्या माहितीत नमूद आहे. POCSO कायद्यानुसार लैंगिक हेतूने बालकाचा पाठलाग करणे, वारंवार संपर्क साधणे किंवा इलेक्ट्रॉनिक माध्यमातून संपर्क करण्यासारख्या कृतींचा समावेश लैंगिक छळाच्या व्याख्येत होऊ शकतो.
तक्रारीतील आरोपांच्या आधारे पोलिसांनी प्रकरणाची नोंद करून पुढील तपास सुरू केला आहे.
तपास डीवायएसपींकडे
प्रकरणाचे गांभीर्य लक्षात घेऊन पुढील तपास उपविभागीय पोलीस अधिकारी (डीवायएसपी) विनायक कोते यांच्याकडे सोपविण्यात आल्याचे पोलिसांकडून सांगण्यात आले आहे.
दरम्यान, या प्रकरणातील आरोपांची सत्यता तपासादरम्यान स्पष्ट होणार असून, पोलिसांकडून सोशल मीडिया संबंधित पुरावे, तक्रारीतील घटनाक्रम आणि इतर उपलब्ध पुराव्यांची पडताळणी केली जाणार आहे.
