आखतवाडे ग्रामपंचायतीच्या कारभाराच्या चौकशीची मागणी!

विकासकामांमध्ये अनियमितता व निधी गैरवापराचे आरोप; माजी सरपंच, ग्रामसेवकांसह संबंधित अधिकाऱ्यांवर कारवाईची मागणी

पाचोरा / जळगाव प्रतिनिधी :
पाचोरा तालुक्यातील आखतवाडे ग्रामपंचायतीच्या विविध विकासकामांमध्ये मोठ्या प्रमाणात अनियमितता झाल्याचा आरोप करण्यात आला असून, शासनाच्या विविध योजनांचा निधी प्रत्यक्ष कामे न करता केवळ कागदोपत्री खर्च दाखवून गैरवापरल्याची चौकशी करण्याची मागणी करण्यात आली आहे. याप्रकरणी आखतवाडे ग्रामपंचायतीचे माजी सरपंच, ग्रामसेवक तसेच संबंधित अधिकाऱ्यांची चौकशी करून दोषी आढळणाऱ्यांवर कारवाई करावी, अशी मागणी केंद्रीय मानव अधिकार सुरक्षा संघटनेचे जळगाव जिल्हाध्यक्ष तथा पत्रकार संदीप मच्छिंद्र कोळी यांनी केली आहे.

यासंदर्भात कोळी यांनी जिल्हा परिषदेचे मुख्य कार्यकारी अधिकारी यांच्याकडे निवेदन सादर केले आहे. या निवेदनातून आखतवाडे ग्रामपंचायतीच्या कारभारातील कथित अनियमिततेची चौकशी करण्याची मागणी करण्यात आली आहे.

कागदावर कामे, प्रत्यक्षात कामांचा अभाव असल्याचा आरोप

शासनाच्या ऑनलाइन प्रणालीमध्ये रस्ते, गटारी तसेच पाइपलाइन दुरुस्ती यांसारख्या विविध कामांवर मोठ्या प्रमाणात खर्च दाखविण्यात आल्याचा आरोप निवेदनात करण्यात आला आहे. मात्र, संबंधित कामांची प्रत्यक्ष पाहणी केल्यास काही कामे जागेवर झालेली नसल्याचे आढळून येते, असा दावा करण्यात आला आहे. त्यामुळे या कामांची प्रत्यक्ष स्थळपाहणी करून खर्चाची आणि कामाच्या गुणवत्तेची चौकशी करण्याची मागणी करण्यात आली आहे.

घरकुल योजनेतील हप्त्यांवर प्रश्नचिन्ह

प्रधानमंत्री आवास योजनेअंतर्गत काही लाभार्थ्यांनी प्रत्यक्ष घराचे बांधकाम सुरू केले नसतानाही त्यांच्या खात्यावर दोन-दोन हप्ते जमा झाल्याचा आरोप निवेदनात करण्यात आला आहे. बांधकामाची प्रत्यक्ष स्थिती, लाभार्थ्यांना वितरित करण्यात आलेला निधी आणि संबंधित कागदपत्रांची तपासणी केल्यास वस्तुस्थिती स्पष्ट होऊ शकते, असे कोळी यांनी नमूद केले आहे.

जल जीवन मिशन योजनेवरही सवाल

आखतवाडे गावात सुमारे दोन कोटी रुपयांच्या खर्चाची जल जीवन मिशन योजना राबविण्यात आल्याचे निवेदनात नमूद करण्यात आले आहे. मात्र, एवढा निधी खर्च झाल्यानंतरही गावकऱ्यांना योजनेतून नियमित पाणीपुरवठा होत नसल्याचा दावा करण्यात आला आहे. त्यामुळे योजनेवरील एकूण खर्च, प्रत्यक्ष कामाची स्थिती, पाणीपुरवठा व्यवस्था आणि संबंधित कंत्राटी कामांची चौकशी करण्याची मागणी करण्यात आली आहे.

माहिती अधिकाराच्या अर्जाला प्रतिसाद नसल्याचा दावा

ग्रामपंचायतीच्या कारभाराबाबत कागदपत्रे व माहिती मिळविण्यासाठी माहितीचा अधिकार अधिनियम, २००५ अंतर्गत अर्ज करण्यात आला होता. मात्र, मागितलेली माहिती उपलब्ध करून देण्यात आली नसल्याचा आरोप निवेदनात करण्यात आला आहे. तसेच पंचायत समिती, पाचोरा कार्यालयाकडूनही या प्रकरणाकडे अपेक्षित गांभीर्याने पाहण्यात आले नसल्याचे निवेदनात म्हटले आहे.

या सर्व बाबींची स्वतंत्र व सखोल चौकशी करून संबंधित विकासकामांची स्थळपाहणी, निधी वितरणाची तपासणी, लाभार्थ्यांच्या खात्यांची पडताळणी तसेच ग्रामपंचायतीच्या आर्थिक व्यवहारांचे लेखापरीक्षण करण्यात यावे. चौकशीत अनियमितता अथवा गैरव्यवहार आढळल्यास संबंधित जबाबदार व्यक्तींवर नियमानुसार कठोर कारवाई करावी, अशी मागणी संदीप कोळी यांनी मुख्य कार्यकारी अधिकाऱ्यांकडे केली आहे.