नाहाटा महाविद्यालयात वैद्यकीय तपासणी शिबिर उत्साहात संपन्न
पदवी व पदव्युत्तर प्रथम वर्षातील विद्यार्थ्यांची तज्ज्ञ डॉक्टरांकडून आरोग्य तपासणी
भुसावळ प्रतिनिधी :
भुसावळ कला, विज्ञान व पू. ओ. नाहाटा वाणिज्य महाविद्यालयात २९ व ३० सप्टेंबर २०२६ या कालावधीत पदवी व पदव्युत्तर प्रथम वर्षातील विद्यार्थ्यांसाठी वैद्यकीय तपासणी शिबिराचे आयोजन करण्यात आले. बी.ए., बी.कॉम., बी.एस्सी., बी.सी.ए. तसेच एम.ए., एम.कॉम., एम.एस्सी. आणि एम.सी.ए. या अभ्यासक्रमांच्या प्रथम वर्षातील विद्यार्थ्यांनी शिबिराचा लाभ घेतला.
महाविद्यालयाचे प्राचार्य डॉ. बी. एच. बऱ्हाटे, उपप्राचार्य डॉ. डी. एन. पाटील, उपप्राचार्य डॉ. जी. आर. वाणी आणि वैद्यकीय समिती प्रमुख डॉ. स्वाती फालक यांच्या उपस्थितीत शिबिराचा शुभारंभ करण्यात आला.
तज्ज्ञ डॉक्टरांकडून विद्यार्थ्यांची तपासणी
शिबिरामध्ये विविध वैद्यकीय क्षेत्रातील तज्ज्ञ डॉक्टरांनी विद्यार्थ्यांची आरोग्य तपासणी केली. डॉ. केतन महाजन व डॉ. विरेंद्र महाजन यांनी सामान्य वैद्यकीय तपासणी केली. डॉ. चारुलता पाटील यांनी नेत्र तपासणी, डॉ. अभय जावळे यांनी स्त्रीरोगविषयक तपासणी, डॉ. चैताली झांबरे यांनी कान, नाक व घसा तपासणी, तर डॉ. विद्याधर भोळे यांनी दंतरोग तपासणी करून विद्यार्थ्यांना आवश्यक आरोग्यविषयक मार्गदर्शन केले.
या शिबिराच्या माध्यमातून विद्यार्थ्यांना नियमित आरोग्य तपासणीचे महत्त्व, आरोग्याची योग्य काळजी आणि विविध प्रतिबंधात्मक उपाययोजनांबाबत मार्गदर्शन मिळाले. विद्यार्थ्यांनी शिबिराला उत्स्फूर्त प्रतिसाद दिला.
निरोगी जीवनशैलीचा संदेश
महाविद्यालयीन विद्यार्थ्यांच्या आरोग्याकडे वेळेत लक्ष देणे आणि संभाव्य आरोग्यविषयक समस्या सुरुवातीच्या टप्प्यात ओळखणे, या दृष्टीने शिबिर उपयुक्त ठरले. या उपक्रमामुळे विद्यार्थ्यांमध्ये आरोग्याविषयी जागरूकता निर्माण होण्यास मदत झाली असून, निरोगी जीवनशैलीचे महत्त्व अधोरेखित झाले.
शिबिराच्या यशस्वी आयोजनासाठी वैद्यकीय समितीचे सदस्य प्रा. डॉ. एस. टी. धूम, प्रा. डॉ. प्रफुल्ल इंगोले, प्रा. डॉ. विलास महिरे, प्रा. डॉ. सचिन कोलते, प्रा. अजय क्षीरसागर, प्रा. गौतम भालेराव, प्रा. डॉ. दीनानाथ पाठक आणि प्रा. मनोज पाटील यांनी परिश्रम घेतले.
तसेच कार्यालयीन प्रबंधक भगवान तायडे, कार्यालय अधीक्षक सचिन पाटील, वरिष्ठ लिपिक गिरीश आव्हाड आणि गणेश ठाकूर यांनी शिबिराच्या आयोजनासाठी सहकार्य केले.
