हरीभाऊ जावळे यांच्या शैक्षणिक कार्याला विद्यार्थ्यांच्या लेखणीतून अभिवादन

हरीभाऊ जावळे यांच्या शैक्षणिक कार्याला विद्यार्थ्यांच्या लेखणीतून अभिवादन

भालोद महाविद्यालयात निबंध स्पर्धा; २८ विद्यार्थ्यांचा उत्स्फूर्त सहभाग, निबंधांचे पुस्तक प्रकाशित करण्याचा मानस

भुसावळ | प्रतिनिधी – संघरत्न सपकाळे : स्वर्गीय खासदार हरीभाऊ जावळे यांच्या जयंतीनिमित्त कला व विज्ञान महाविद्यालय, भालोद येथील राज्यशास्त्र विभागाच्या वतीने शनिवार, दि. ३ ऑक्टोबर २०२६ रोजी निबंध स्पर्धेचे आयोजन करण्यात आले. या स्पर्धेत महाविद्यालयातील २८ विद्यार्थ्यांनी उत्स्फूर्त सहभाग नोंदवत विविध विषयांवर निबंध सादर केले.

ग्रामीण भागातील विद्यार्थ्यांना उच्च शिक्षणाची संधी सहज उपलब्ध व्हावी आणि परिसरातील मुला-मुलींना शिक्षणासाठी दूर जावे लागू नये, या दूरदृष्टीतून स्वर्गीय खासदार हरीभाऊ जावळे यांनी भालोद येथे कला व विज्ञान महाविद्यालयाच्या निर्मितीसाठी महत्त्वपूर्ण योगदान दिले. त्यांच्या शैक्षणिक कार्याचे स्मरण तसेच त्यांच्या विचारांची आणि कार्याची ओळख नव्या पिढीला व्हावी, या उद्देशाने ही स्पर्धा घेण्यात आली.

विद्यार्थ्यांसाठी विविध विषय

स्पर्धेसाठी विद्यार्थ्यांना ‘ग्रामीण भागातील उच्च शिक्षणाची ज्ञानगंगा’, ‘स्वर्गीय हरीभाऊ जावळे यांचे शैक्षणिक योगदान’, ‘भालोदच्या शैक्षणिक परिवर्तनाचे शिल्पकार’, ‘एका महाविद्यालयाची निर्मिती आणि हजारो स्वप्नांना मिळालेले पंख’, ‘शिक्षणातून ग्रामविकास’, ‘ग्रामीण विद्यार्थ्यांसाठी उच्च शिक्षणाची संधी’, ‘मुलींच्या उच्च शिक्षणासाठी भालोद महाविद्यालयाचे योगदान’, ‘लोकप्रतिनिधी आणि शिक्षणविकास’, ‘एका दूरदृष्टीच्या लोकनेत्याचे शैक्षणिक स्वप्न’, ‘शिक्षणाची संधी ते आत्मनिर्भरता’, ‘हरीभाऊ जावळे यांचे शैक्षणिक कार्य : प्रेरणा, विचार आणि वारसा’, ‘उच्च शिक्षणाचे विकेंद्रीकरण आणि ग्रामीण समाजाचा विकास’ यांसह विविध विषय देण्यात आले होते.

विद्यार्थ्यांनी आपल्या आवडीच्या विषयांची निवड करून त्यावर अभ्यासपूर्ण निबंध लेखन केले.

२८ वर्षांचा शैक्षणिक वारसा

कला व विज्ञान महाविद्यालय, भालोदच्या स्थापनेला आता २८ वर्षे पूर्ण झाली आहेत. या कालावधीत महाविद्यालयातून शिक्षण घेतलेल्या अनेक विद्यार्थी-विद्यार्थिनींनी विविध क्षेत्रांत उल्लेखनीय यश संपादन केले आहे. डॉक्टर, अभियंते, प्राध्यापक, वकील, शासकीय अधिकारी तसेच खासगी क्षेत्रातील विविध पदांवर कार्यरत असलेल्या माजी विद्यार्थ्यांच्या यशामध्ये महाविद्यालयाचे योगदान राहिले आहे.

या शैक्षणिक प्रवासाचा आणि हरीभाऊ जावळे यांच्या योगदानाचा मागोवा विद्यार्थ्यांच्या लेखणीतून घेण्याचा प्रयत्न या उपक्रमातून करण्यात आला.

निबंधांचे पुस्तक प्रकाशित करण्याचा मानस

स्पर्धेत सहभागी झालेल्या सर्व २८ विद्यार्थ्यांना सहभाग प्रमाणपत्र देण्यात येणार आहे. तसेच प्रथम क्रमांकासाठी ₹५०१, द्वितीय क्रमांकासाठी ₹२५१, तृतीय क्रमांकासाठी ₹१५१ आणि पाच उत्तेजनार्थ पारितोषिके देण्यात येणार आहेत.

या स्पर्धेचे आणखी एक वैशिष्ट्य म्हणजे विद्यार्थ्यांनी लिहिलेल्या निबंधांचे संकलन करून स्वतंत्र पुस्तक प्रकाशित करण्याचा मानस राज्यशास्त्र विभागाने व्यक्त केला आहे. त्यामुळे विद्यार्थ्यांचे लेखन केवळ स्पर्धेपुरते मर्यादित न राहता स्वर्गीय हरीभाऊ जावळे यांच्या शैक्षणिक कार्याचा दस्तऐवज म्हणून जतन होण्यास मदत होणार आहे.

“विद्यार्थ्यांच्या लेखणीतून हीच खरी आदरांजली”

या उपक्रमासाठी महाविद्यालयाचे प्राचार्य प्रा. डॉ. किशोर कोल्हे यांचे मार्गदर्शन लाभले. राज्यशास्त्र विभागप्रमुख प्रा. डॉ. सुनील नेवे यांच्या पुढाकारातून स्पर्धेचे आयोजन करण्यात आले.

यावेळी संस्था अध्यक्ष गणेश नेहेते तसेच संचालक मंडळातील पदाधिकारी उपस्थित होते.

“हरीभाऊ जावळे यांनी ग्रामीण भागातील विद्यार्थ्यांसाठी पाहिलेले शिक्षणाचे स्वप्न आजही महाविद्यालयाच्या माध्यमातून साकार होत आहे. विद्यार्थ्यांच्या लेखणीतून त्यांच्या कार्याचे स्मरण करणे हीच त्यांना खरी आदरांजली आहे,” अशी भावना यावेळी व्यक्त करण्यात आली.