भ्रष्टाचार निर्मूलन संघर्ष समितीच्या धरणगाव तालुकाध्यक्षपदी योगेश येवले
शहराध्यक्षपदी संदीप फुलझाडे यांची नियुक्ती; जिल्हाध्यक्ष नवनाथ मांडे व जिल्हा कार्याध्यक्ष किशोर पाटील यांच्या हस्ते नियुक्तीपत्र प्रदान
धरणगाव | प्रतिनिधी
अखिल भारतीय भ्रष्टाचार निर्मूलन संघर्ष समितीच्या धरणगाव तालुकाध्यक्षपदी योगेश देविदास येवले, तर शहराध्यक्षपदी संदीप प्रभाकर फुलझाडे यांची नियुक्ती करण्यात आली आहे. समितीचे जळगाव जिल्हाध्यक्ष नवनाथ रंगनाथ मांडे आणि जिल्हा कार्याध्यक्ष किशोर पाटील यांच्या हस्ते दोन्ही नवनियुक्त पदाधिकाऱ्यांना नियुक्तीपत्र प्रदान करण्यात आले.
भ्रष्टाचाराला आळा घालणे, सर्वसामान्य नागरिकांच्या समस्या प्रशासनापर्यंत पोहोचविणे आणि नागरिकांच्या न्याय्य हक्कांसाठी पाठपुरावा करणे, या उद्देशाने नवनियुक्त पदाधिकाऱ्यांवर जबाबदारी सोपविण्यात आली आहे. शासकीय व प्रशासकीय कामकाजादरम्यान नागरिकांना येणाऱ्या अडचणी, अन्यायाविरुद्ध आवाज उठविणे आणि भ्रष्टाचारासंदर्भातील तक्रारी योग्य व्यासपीठावर मांडण्यासाठी समितीच्या माध्यमातून प्रयत्न करण्याची अपेक्षा व्यक्त करण्यात आली.
धरणगाव तालुका व शहरातील नागरिकांच्या समस्या जाणून घेऊन त्या सोडविण्यासाठी संबंधित विभागांकडे पाठपुरावा करणे, भ्रष्टाचारविरोधी जनजागृती करणे आणि संघटनेचे कार्य तळागाळापर्यंत पोहोचविणे, यावर नवनियुक्त पदाधिकारी भर देणार आहेत.
नियुक्तीपत्र प्रदान करताना जिल्हाध्यक्ष नवनाथ रंगनाथ मांडे आणि जिल्हा कार्याध्यक्ष किशोर पाटील यांनी योगेश येवले व संदीप फुलझाडे यांना पुढील सामाजिक व संघटनात्मक कार्यासाठी शुभेच्छा दिल्या. या नियुक्तीबद्दल दोन्ही पदाधिकाऱ्यांचे विविध स्तरांतून अभिनंदन होत आहे.
