धडगावच्या वनगावांतील अतिक्रमित शेतकऱ्यांना दुष्काळी भरपाई द्या!

वनपट्टे प्रलंबित असलेल्या शेतकऱ्यांच्या पिकांचे मोठे नुकसान; जिल्हाधिकाऱ्यांकडे निवेदनाद्वारे मागणी

धडगाव, प्रतिनिधी : धडगाव तालुक्यातील वनजमिनींवर वर्षानुवर्षे शेती करणाऱ्या, मात्र अद्याप वनहक्क पट्टे न मिळालेल्या शेतकऱ्यांनाही दुष्काळी मदत आणि पीक नुकसानभरपाई मिळावी, अशी मागणी जिल्हाधिकाऱ्यांकडे निवेदनाद्वारे करण्यात आली आहे. यंदाच्या दुष्काळामुळे या शेतकऱ्यांच्या पिकांचे मोठ्या प्रमाणात नुकसान झाले असून, आर्थिक संकटात सापडलेल्या वनशेतकऱ्यांना तातडीने दिलासा देण्याची मागणी करण्यात येत आहे.

धडगाव तालुक्यात एकूण ७३ वनगावे आहेत. या गावांतील काही शेतकऱ्यांना वनहक्क कायद्यांतर्गत वनपट्टे मिळाले आहेत; परंतु अनेक शेतकऱ्यांचे वनपट्टे अद्याप प्रलंबित आहेत. वनपट्टे मिळाले नसले, तरी हे शेतकरी अनेक वर्षांपासून संबंधित जमिनींवर प्रत्यक्ष शेती करून आपल्या कुटुंबाचा उदरनिर्वाह करीत आहेत.

चालू हंगामात शेतकऱ्यांनी कर्ज काढून बी-बियाणे, खते आणि शेतीच्या मशागतीवर खर्च केला होता. मात्र, पावसाअभावी आणि दुष्काळी परिस्थितीमुळे पिके करपून गेली आहेत. त्यामुळे उत्पादनाची आशा मावळली असून, घेतलेले कर्ज कसे फेडायचे, असा प्रश्न शेतकऱ्यांसमोर उभा राहिला आहे.

प्रत्यक्ष पीकपेरा लक्षात घेऊन पंचनामे करा

वनपट्टे प्रलंबित असलेल्या शेतकऱ्यांच्या जमिनींची नोंद महसूल अभिलेखात नसल्यामुळे त्यांना नुकसानभरपाईपासून वंचित राहावे लागू नये, अशी भूमिका निवेदनात मांडण्यात आली आहे. संबंधित शेतकऱ्यांनी प्रत्यक्ष शेती केली आहे आणि पिकांचे नुकसान झाले आहे, त्यामुळे त्यांच्या परिस्थितीचा विचार करून शासनाने मदतीबाबत योग्य निर्णय घ्यावा, अशी मागणी करण्यात आली आहे.

वन विभाग आणि महसूल विभागाच्या अधिकाऱ्यांनी संयुक्तपणे बाधित गावांची पाहणी करावी. प्रत्यक्ष पीकपेरा, शेतीचे क्षेत्र आणि नुकसानीची स्थिती तपासून योग्य ती कार्यवाही करावी. तसेच लागू असलेल्या शासकीय निकषांनुसार पात्र शेतकऱ्यांना पीक नुकसानभरपाई व दुष्काळी मदत मंजूर करण्यासाठी तातडीने पावले उचलावीत, अशी मागणी करण्यात आली आहे.

तालुक्यातील अनेक गावांना दुष्काळाचा फटका

धडगाव तालुक्यातील सावऱ्यादिगर, भमाणा, उडद्या, खापरमाळ, भाबरी, सादरी, लेखडा, भरड, थुवानी, अट्ठी, बोरसीसा, दुठ्ठल, चिचखेडी, डोमखेडी, निमगव्हण, सुरुंग, तिनिसमाळ, कुकतार, आकवाणी, कुंभरी, नलगव्हाण, गोराडी, शेलगदा, पीपलचोप, केली, शिक्का, गेंदा, माळ, बिलगाव, चिखली, बोरी, खर्डी खुर्द, निमखेडी, खुटवडा, शेलदा, बेडीपाडा, खडकला खुर्द, खडकला बुद्रुक, मांडवी बुद्रुक, मांडवी खुर्द, टेभुर्णी, बोदला, वावी, राजबर्डी, शेलकुवी, शिंदवाणी, कुकलट, तेलखेडी, कात्रा, निगदी, त्रिशूल, कुवरखेत, वेलखेडी, वलवाल, घाटली, धावलघाट, कामोद वसाहत, काकडदा, खांबला, सिरसाणी, बिजरी, काकारपाटी, उखळीआंबा, चाँदसैली, झुम्मट, मकतारझिरा, मोजरा, वाहवाणी, पौला, सिंधीदिगर, कुंड्या आणि फलई आदी गावांतील शेतकऱ्यांचे नुकसान झाल्याचे निवेदनात नमूद करण्यात आले आहे.

जिल्हा प्रशासनाच्या निर्णयाकडे लक्ष

हे निवेदन जिल्हा परिषद सदस्य हारसिंग मल्या पावरा यांच्या नेतृत्वाखाली राज्या पावरा, सावऱ्या, ठाणसिंग पावरा, जामसिंग पावरा (सरपंच, बिलगाव), कालशा पावरा, दशरथ मालसिंग पावरा आणि इतर स्थानिक शेतकऱ्यांच्या वतीने जिल्हाधिकाऱ्यांना सादर करण्यात आले आहे.

वनपट्टे प्रलंबित असल्याने शेतकऱ्यांना दुष्काळी मदतीपासून वंचित राहावे लागू नये, यासाठी शासनाने त्यांच्या परिस्थितीचा सहानुभूतीपूर्वक विचार करावा, अशी अपेक्षा व्यक्त होत आहे. जिल्हा प्रशासन या निवेदनाची दखल घेऊन बाधित वनशेतकऱ्यांना मदत मिळवून देण्यासाठी कोणती कार्यवाही करते, याकडे धडगाव तालुक्यातील शेतकऱ्यांचे लक्ष लागले आहे.