जळगाव शासकीय वैद्यकीय महाविद्यालयात कर्मचाऱ्यांचे बेमुदत धरणे आंदोलन!

राष्ट्रीय मूलनिवासी बहुजन कर्मचारी संघाच्या आरोग्य शाखेचे आंदोलन १२ ऑक्टोबरपासून सुरू; सरळसेवा भरती, पदोन्नती आणि नर्सिंग भत्त्यासह सात प्रमुख मागण्या

जळगाव, प्रतिनिधी : शासकीय वैद्यकीय महाविद्यालय व रुग्णालय, जळगाव येथे राष्ट्रीय मूलनिवासी बहुजन कर्मचारी संघाच्या आरोग्य शाखेच्या वतीने १२ ऑक्टोबरपासून बेमुदत धरणे आंदोलन सुरू करण्यात आले आहे. कंत्राटी पद्धतीने होणारी भरती रद्द करून सरळसेवेने पदभरती करावी, पदोन्नती द्यावी, नर्सिंग भत्ता लागू करावा यांसह विविध मागण्यांसाठी कर्मचारी आंदोलनात सहभागी झाले आहेत.

राष्ट्रीय मूलनिवासी बहुजन कर्मचारी संघाच्या म्हणण्यानुसार, महाराष्ट्रातील विविध जिल्ह्यांतील सामान्य रुग्णालयांमध्ये कर्मचाऱ्यांच्या प्रलंबित प्रश्नांकडे शासनाचे लक्ष वेधण्यासाठी हे आंदोलन सुरू करण्यात आले आहे. जळगाव येथील शासकीय वैद्यकीय महाविद्यालय व रुग्णालयातही कर्मचाऱ्यांनी आपल्या मागण्यांसाठी धरणे धरले आहे.

सात प्रमुख मागण्यांसाठी आंदोलन

या आंदोलनाद्वारे संघटनेने सात प्रमुख मागण्या मांडल्या आहेत. त्यामध्ये कंत्राटी पद्धतीने होणारी भरती रद्द करून तातडीने सरळसेवेने पदभरती करावी, पदभरतीतील ८०:२० ची अन्यायकारक अट रद्द करावी आणि सर्व पात्र कर्मचाऱ्यांना तातडीने पदोन्नती द्यावी, या मागण्यांचा समावेश आहे.

तसेच सीएनई (CNE) रजिस्ट्रेशनची सक्तीची अट रद्द करावी, परिचारिका संवर्गातील कर्मचाऱ्यांना दरमहा ९ हजार रुपयांचा नर्सिंग भत्ता लागू करावा, परिचर्या संवर्गातील सर्व पदनामे केंद्र सरकारच्या धर्तीवर सुधारित करून अद्ययावत करावीत, अशी मागणी करण्यात आली आहे.

याशिवाय राज्यस्तरीय सेवाज्येष्ठता यादी तयार करून सेवाज्येष्ठ कर्मचाऱ्यांना पदभरती व पदोन्नतीच्या प्रक्रियेत प्रथम संधी द्यावी, अशीही संघटनेची मागणी आहे.

शीला पटोकार, दीपक बोरसे यांचे नेतृत्व

या आंदोलनाचे नेतृत्व राष्ट्रीय मूलनिवासी संघाच्या जळगाव जिल्हाध्यक्ष शीला पटोकार आणि राष्ट्रीय मूलनिवासी बहुजन कर्मचारी संघाचे जळगाव जिल्हा सचिव दीपक बोरसे यांनी केले.

आंदोलनात रोहित कोळी, महेश्वर घुलेश्वर, कल्पना बच्छाव, जयश्री वानखेडे, निकिता गवई, आंचल शेख, संकिता जाधव, मोनाली कदम, केतकी कुंभार, विशाल सोळंकी, शिवराज गायकवाड, अनिल वळवी, सुरज अहिरराव, सोमेश निकम, अनिल भोई, धीरज मुंढे, परवेज शेख, तेजस्विनी जाधव, गणेश वायाळ आणि सौरभ शिंदे यांनी सहभाग नोंदवला.

विविध संघटनांचा आंदोलनाला पाठिंबा

या आंदोलनाला विविध सामाजिक व संघटनात्मक पदाधिकाऱ्यांनी पाठिंबा दिला. सुमित्र अहिरे (राज्य प्रभारी, आंदोलन निर्माण समिती), दिलीप जाधव (तालुकाध्यक्ष, बुद्धिस्ट इंटरनॅशनल नेटवर्क), रविंद्र मोरे (तालुकाध्यक्ष, भारत मुक्ती मोर्चा) आणि कैलास मसाने (तालुकाध्यक्ष, राष्ट्रीय मूलनिवासी पेन्शनर संघ) यांनी आंदोलनाला सक्रिय पाठिंबा दर्शविला.

कर्मचाऱ्यांच्या मागण्यांवर शासन आणि संबंधित प्रशासन कोणती भूमिका घेते, तसेच आंदोलनाबाबत पुढील निर्णय काय होतो, याकडे कर्मचाऱ्यांचे आणि रुग्णालय प्रशासनाचे लक्ष लागले आहे.