साक्री पोलिसांचा अवैध डिझेल विक्रीच्या संशयित धंद्यावर छापा; टँकरसह ४८ लाखांचा मुद्देमाल जप्त

सुरत-धुळे राष्ट्रीय महामार्गावरील काकाच्या ढाब्याजवळ कारवाई; टँकरचालक ताब्यात, पाच जणांविरोधात गुन्हा दाखल

साक्री | प्रतिनिधी

सुरत-धुळे राष्ट्रीय महामार्गावरील काकाचा ढाबा परिसरात टँकरमधून बेकायदेशीररीत्या डिझेल काढले जात असल्याची माहिती मिळाल्यानंतर साक्री पोलिसांनी छापा टाकून कारवाई केली. बोडकीखडी परिसरातील पत्र्याच्या शेडमध्ये सुरू असलेल्या या प्रकारात पोलिसांनी डिझेल टँकरसह एकूण ४८ लाख ५ हजार ४८ रुपये किमतीचा मुद्देमाल जप्त केला आहे. या प्रकरणी टँकरचालकाला ताब्यात घेण्यात आले असून, पाच जणांविरोधात गुन्हा दाखल करण्यात आला आहे.

गुप्त माहितीच्या आधारे पोलिसांची कारवाई

परिविक्षाधीन पोलीस उपअधीक्षक ओमकार गवळी यांना मिळालेल्या गुप्त माहितीच्या आधारे साक्री पोलिसांच्या पथकाने बोडकीखडी परिसरात छापा टाकला. यावेळी एका पत्र्याच्या शेडमध्ये टँकरमधून डिझेल काढले जात असल्याचे पोलिसांच्या निदर्शनास आले. पोलिसांनी तत्काळ कारवाई करत टँकरचालक चंद्रप्रकाश वीरेंद्रकुमार मिश्रा (रा. प्रयागराज, उत्तर प्रदेश) याला ताब्यात घेतले.

चौकशीत इतरांची नावे समोर

टँकरचालकाकडे अधिक चौकशी केली असता सचिन जीवनराम मुरतडकर (वय २९, रा. मिरच्या मारुती चौक, धुळे) आणि सलीम इसुफ खान (रा. राजस्थान) यांच्यासह अन्य व्यक्तींचा या प्रकारात सहभाग असल्याची माहिती मिळाल्याचे पोलिसांनी सांगितले. या प्रकरणात पाच जणांविरोधात गुन्हा दाखल करण्यात आला असून, जप्त केलेल्या मुद्देमालाची एकूण किंमत ४८ लाख ५ हजार ४८ रुपये असल्याचे सांगण्यात आले आहे.

या प्रकरणाचा पुढील तपास साक्री पोलीस करत आहेत. डिझेल काढण्यामागील नेमका उद्देश, या व्यवहारामागील इतर व्यक्ती आणि संपूर्ण प्रकाराचे स्वरूप तपासातून स्पष्ट होणार आहे.

वरिष्ठांच्या मार्गदर्शनाखाली कारवाई

जिल्हा पोलीस अधीक्षक विशाल आनंद, अपर पोलीस अधीक्षक अजय देवरे आणि उपविभागीय पोलीस अधिकारी सुधीर पाटील यांच्या मार्गदर्शनाखाली परिविक्षाधीन पोलीस उपअधीक्षक ओमकार गवळी यांच्या नेतृत्वात साक्री पोलिसांनी ही कारवाई केली.