महात्मा फुले यांच्या द्विशताब्दी जन्मोत्सवानिमित्त दहिवद येथे राज्यस्तरीय चर्चासत्र!

सामाजिक, शैक्षणिक व आर्थिक सक्षमीकरणावर होणार विचारमंथन; महाराष्ट्र, मध्यप्रदेश आणि गुजरातमधील समाजबांधवांना उपस्थित राहण्याचे आवाहन

अमळनेर : प्रतिनिधी

क्रांतीसूर्य तात्यासाहेब महात्मा ज्योतिराव फुले यांच्या द्विशताब्दी जन्मोत्सवाचे औचित्य साधून श्री क्षत्रिय माळी समाज सुधारणा मंडळ (महाराष्ट्र, मध्यप्रदेश, गुजरात) यांच्या वतीने भव्य राज्यस्तरीय सामाजिक, शैक्षणिक व आर्थिक सक्षमीकरण चर्चासत्राचे आयोजन करण्यात आले आहे. रविवार, दि. १५ नोव्हेंबर २०२६ रोजी सकाळी ९.३० वाजता नवभारत माध्यमिक विद्यालय, दहिवद, ता. अमळनेर, जि. जळगाव येथे हे चर्चासत्र पार पडणार आहे.

महात्मा फुले यांनी समाजाला दिलेले शिक्षण, समता, सामाजिक न्याय आणि स्त्री-पुरुष समानतेचे विचार समाजाच्या शेवटच्या घटकापर्यंत पोहोचविणे, तसेच सामाजिक, शैक्षणिक, आर्थिक व धार्मिक समस्यांवर सकारात्मक विचारमंथन करून समाजाच्या सर्वांगीण प्रगतीची दिशा निश्चित करणे हा या उपक्रमाचा मुख्य उद्देश आहे.

मान्यवरांच्या हस्ते उद्घाटन

या चर्चासत्राचे उद्घाटन श्री क्षत्रिय माळी समाज सुधारणा मंडळाचे माजी अध्यक्ष निळकंठ देवचंद महाजन आणि जळगाव जिल्हा परिषद व नियोजन समितीचे माजी सदस्य नानाभाऊ पोपट महाजन यांच्या हस्ते होणार आहे. कार्यक्रमाच्या अध्यक्षस्थानी मंडळाचे अध्यक्ष आत्माराम कौतिक गंभीर राहणार आहेत.

शिक्षण, अर्थकारण आणि सामाजिक विषयांवर मार्गदर्शन

चर्चासत्रात विविध विषयांवर तज्ज्ञ मान्यवर मार्गदर्शन करणार आहेत.

• शैक्षणिक विषय : सेवानिवृत्त शिक्षणाधिकारी निळकंठ रामचंद्र गायकवाड.

• आर्थिक विषय : समाधान रतन पाटील, रेखाताई गोपाल पाटील आणि किरण दोधू महाजन.

• सामाजिक विषय : रामकृष्ण बापूराव महाजन आणि गायत्रीताई शैलेश शेलकर.

समाजाच्या विविध प्रश्नांवर अभ्यासपूर्ण चर्चा करून भविष्यातील विकासासाठी ठोस दिशा ठरविण्याचा प्रयत्न या चर्चासत्रातून केला जाणार आहे.

गावोगावी सामाजिक संघटनांना बळ देण्याचा संकल्प

समाजाच्या प्रत्येक गावात सामाजिक जनजागृती निर्माण व्हावी, गावोगावी समाजमंडळे, महिला मंडळे आणि युवक मंडळे अधिक सक्षम व्हावीत, यासाठी या चर्चासत्राचे आयोजन करण्यात आले आहे. युवक-युवती, महिला आणि ज्येष्ठ नागरिकांनी एकत्र येऊन समाजाच्या विकासात सक्रिय योगदान द्यावे, अशी अपेक्षा आयोजकांनी व्यक्त केली आहे.

या उपक्रमाला दहिवद येथील श्री क्षत्रिय माळी समाज सुधारणा मंडळ, महात्मा फुले नवयुवक मित्र मंडळ आणि क्रांतीज्योती सावित्रीबाई फुले महिला मंडळ यांचे सहकार्य लाभत आहे.

विचारांचे कृतीत रूपांतर करण्याचा निर्धार

समाजाच्या प्रगतीसाठी केवळ चर्चा न करता विचारांचे कृतीत रूपांतर व्हावे, शिक्षण, संघटन आणि आर्थिक स्वावलंबनाच्या माध्यमातून समाजाची नवी दिशा निश्चित व्हावी, हा या राज्यस्तरीय चर्चासत्रामागील व्यापक दृष्टिकोन आहे.

या चर्चासत्रास महाराष्ट्र, मध्यप्रदेश आणि गुजरातमधील समाजबांधवांनी मोठ्या संख्येने उपस्थित राहावे, असे आवाहन मंडळाचे उपाध्यक्ष सुरेश महाजन, सचिव किशोर राजकुळे, सहसचिव योगेश महाजन, समिती प्रमुख दीपक महाजन, उपप्रमुख संजय महाजन आणि सर्व सदस्यांनी केले आहे.

“एक विचार… एक ध्येय… समाजाच्या सर्वांगीण प्रगतीचा संकल्प!”

॥ जय ज्योती! जय सावता! जय क्रांती! ॥