दिवाळीचा गोडवा पाळधीकरांच्या दारी! उद्योजक दिलीपबापू पाटील यांच्यातर्फे संपूर्ण गावाला मिठाई वाटप
पालकमंत्री गुलाबराव पाटील यांच्या उपस्थितीत सामाजिक बांधिलकीचा अनोखा उपक्रम; पेढ्यांच्या गोडव्याने पाळधीकरांचा दिवाळी आनंद द्विगुणित
पाळधी, ता. धरणगाव : दिवाळी म्हणजे आनंद, उत्साह, प्रेम आणि आपुलकीचा सण! याच सणाचा गोडवा गावातील प्रत्येक नागरिकाच्या घरापर्यंत पोहोचविण्याच्या उद्देशाने पाळधी येथील उद्योजक दिलीपबापू पाटील यांच्या वतीने संपूर्ण गावातील नागरिकांना घरपोच पेढ्यांचे वाटप करण्यात आले. पालकमंत्री तथा राज्याचे पाणीपुरवठा व स्वच्छता मंत्री गुलाबराव पाटील यांच्या प्रमुख उपस्थितीत हा उपक्रम उत्साहपूर्ण वातावरणात पार पडला.
मिठाईच्या गोडव्यातून आपुलकीचा संदेश
दिवाळीचा आनंद केवळ स्वतःपुरता मर्यादित न ठेवता तो समाजातील प्रत्येक घटकासोबत वाटून घेण्याच्या भावनेतून या उपक्रमाचे आयोजन करण्यात आले होते. गावातील प्रत्येक घरापर्यंत मिठाई पोहोचवून सणाचा आनंद सर्वांसोबत साजरा करण्याचा प्रयत्न दिलीपबापू पाटील यांनी केला.
पेढ्यांच्या गोडव्याबरोबरच प्रेम, आपुलकी आणि सामाजिक एकतेचा संदेश या उपक्रमातून देण्यात आला. त्यामुळे पाळधीकरांचा दिवाळीचा आनंद द्विगुणित झाला. सणासुदीच्या काळात संपूर्ण गावाला सहभागी करून घेणाऱ्या या उपक्रमाचे परिसरातून कौतुक होत आहे.
मान्यवरांची उपस्थिती
या प्रसंगी पालकमंत्री गुलाबराव पाटील, माजी जिल्हा परिषद सदस्य प्रतापराव पाटील, उद्योजक शरद कासट, विक्रम पाटील, दिनकर पाटील, राजूभैय्या पाटील, संजय पाटील, हेमंत पाटील, सुनील पाटील, भगवान मराठे, गुलाब फुलझाडे, चंदू पाटील, नय्युम देशपांडे, फारुक शेख यांच्यासह दिलीपबापू मित्रपरिवार आणि समाजबांधव मोठ्या संख्येने उपस्थित होते.
सणाचा आनंद सर्वांसोबत वाटून घेण्याच्या या उपक्रमातून दिलीपबापू पाटील यांनी सामाजिक बांधिलकीचे दर्शन घडविले. त्यांच्या या उपक्रमाचे पाळधी परिसरातून विशेष कौतुक होत आहे.
