सुरेश कोळी यांची बोदवड तालुका कार्याध्यक्षपदी नियुक्ती!
आद्य क्रांतिकारक राघोजी भांगरे यांच्या विचारांचा प्रसार; समाजाच्या न्याय्य हक्कांसाठी संघटितपणे लढा देण्याची जबाबदारी
बोदवड (प्रतिनिधी – सतीश बावस्कर) : आद्य क्रांतिकारक राघोजी भांगरे यांच्या संघर्षमय विचारांचा प्रचार आणि प्रसार करण्यासह आदिवासी कोळी महादेव, डोंगर कोळी, कोळी मल्हार, टोकरे कोळी, कोळी ढोर आदी समाजघटकांच्या न्याय्य हक्कांसाठी संघटितपणे कार्य करण्याची महत्त्वपूर्ण जबाबदारी सुरेश कोळी यांच्यावर सोपविण्यात आली आहे. त्यांची बोदवड तालुका कार्याध्यक्षपदी नियुक्ती करण्यात आली आहे.
संघटन विस्तारासह सामाजिक प्रश्नांसाठी पुढाकार
नियुक्तीपत्राद्वारे सुरेश कोळी यांच्यावर संघटनेचा विस्तार करण्यासाठी स्थानिक पातळीवर पदाधिकाऱ्यांच्या नियुक्त्या करणे, समाजबांधवांना संघटित करणे, समाजातील विविध प्रश्नांना वाचा फोडणे तसेच समाजाच्या न्याय्य हक्कांसाठी सुरू असलेल्या संघर्षात सक्रिय सहभाग घेण्याची जबाबदारी सोपविण्यात आली आहे.
संघटनेचे कार्य अधिक बळकट होण्याची अपेक्षा
या नियुक्तीमुळे बोदवड तालुक्यात संघटनेचे कार्य अधिक बळकट होईल, असा विश्वास समितीचे अध्यक्ष दत्ताभाऊ सुरवसे यांनी व्यक्त केला.
सुरेश कोळी यांच्या नियुक्तीबद्दल तालुक्यातील समाजबांधवांकडून त्यांचे अभिनंदन करून पुढील वाटचालीस शुभेच्छा दिल्या जात आहेत. आगामी काळात संघटनेच्या माध्यमातून समाजाच्या विविध प्रश्नांना न्याय मिळवून देण्यासाठी ते कशा प्रकारे कार्य करतात, याकडे तालुक्यातील समाजबांधवांचे लक्ष लागले आहे.
