प्राचार्यपदी निवड झाल्याबद्दल संघशिल भद्रे यांचा अधिकारी-अभिवक्ता मित्रांकडून सन्मान!
शाल, पुष्पहार आणि संविधानाच्या प्रास्ताविकेने गौरव; नवनियुक्त प्राचार्यांच्या हस्ते मित्रांचाही सत्कार
मुखेड | प्रतिनिधी
प्राचार्यपदी निवड झाल्याबद्दल प्राचार्य तथा स्पर्धा परीक्षा मार्गदर्शक संघशिल भद्रे ऊर्फ एस. एन. नांदेडकर सर यांचा त्यांच्या अधिकारी आणि अभिवक्ता मित्रमंडळींच्या वतीने सन्मान करण्यात आला. शाल, पुष्पहार आणि भारतीय संविधानाची प्रास्ताविका भेट देऊन त्यांचा गौरव करण्यात आला. यावेळी उपस्थितांनी भद्रे सर यांचे अभिनंदन करत त्यांच्या पुढील शैक्षणिक व सामाजिक वाटचालीस शुभेच्छा दिल्या.
या सन्मान सोहळ्यास मुखेड अभिवक्ता संघाचे उपाध्यक्ष अ‍ॅड. शंकर बादावाड, ग्रामपंचायत अधिकारी साहेबराव पांडुर्णिकर, पशुवर्धन पर्यवेक्षक प्रतीक लिंबेकर आणि स्पर्धा परीक्षा अभ्यासक कैलासजी लोहबंदे यांची प्रमुख उपस्थिती होती. प्राचार्यपदी झालेली निवड ही त्यांच्या शैक्षणिक कार्याची आणि मार्गदर्शनाच्या योगदानाची दखल असल्याची भावना मित्रमंडळींनी व्यक्त केली.
नवनियुक्त प्राचार्यांच्या हस्ते मित्रांचाही गौरव
दरम्यान, महाविद्यालयाच्या वतीने आयोजित सत्कार समारंभात नवनियुक्त प्राचार्य संघशिल भद्रे ऊर्फ एस. एन. नांदेडकर सर यांच्या हस्ते मुखेड अभिवक्ता संघाचे उपाध्यक्ष अ‍ॅड. शंकर बादावाड, ग्रामपंचायत अधिकारी साहेबराव पांडुर्णिकर आणि पशुवर्धन पर्यवेक्षक प्रतीक लिंबेकर यांचाही शाल व पुष्पहार देऊन सन्मान करण्यात आला.
परस्परांप्रती आदरभाव, मैत्री आणि सामाजिक बांधिलकी जपणारा हा सोहळा उत्साहपूर्ण वातावरणात पार पडला. पद आणि जबाबदाऱ्या वेगवेगळ्या असल्या तरी मैत्रीचे नाते आणि एकमेकांच्या यशाचा आनंद साजरा करण्याची भावना या निमित्ताने अधोरेखित झाली.
