वाघोदा बुद्रुक उपसरपंचपदी महेंद्र काळे १ मताने विजयी; ७५ वर्षांनंतर मराठा समाजाला प्रतिनिधित्व!
अटीतटीच्या निवडणुकीत महेंद्र काळे यांना ९, तर छाया महाजन यांना ८ मते; विजयाचा ग्रामस्थांकडून जल्लोषात उत्सव
रावेर (प्रतिनिधी – अक्षय वाघ) : वाघोदा बुद्रुक (ता. रावेर) येथील ग्रामपंचायतीच्या उपसरपंचपदाच्या अत्यंत चुरशीच्या निवडणुकीत अखेर महेंद्र काळे यांनी अवघ्या एका मताने विजय मिळवला. या विजयामुळे वाघोदा बुद्रुकच्या इतिहासात तब्बल ७५ वर्षांनंतर मराठा समाजाला उपसरपंचपदाचे प्रतिनिधित्व मिळाल्याने ग्रामस्थांमध्ये आनंदाचे वातावरण निर्माण झाले आहे.
शुक्रवार, दिनांक २० नोव्हेंबर २०२६ रोजी ग्रामविकास अधिकारी हरी तायडे आणि लोकनियुक्त सरपंच अलका बाळू महाजन यांच्या अध्यक्षतेखाली निवडणूक प्रक्रिया शांततेत पार पडली. उपसरपंचपदाच्या या थेट लढतीत महेंद्र काळे आणि छाया प्रभाकर महाजन यांच्यात अटीतटीचा सामना रंगला होता.
अवघ्या एका मताने विजयाची बाजी
मतदान प्रक्रियेनंतर छाया प्रभाकर महाजन यांना ८ मते मिळाली, तर महेंद्र काळे यांनी ९ मते मिळवत अवघ्या एका मताच्या फरकाने विजय संपादन केला. निवडणूक निर्णय अधिकाऱ्यांनी महेंद्र काळे यांना विजयी घोषित करताच समर्थकांनी गुलालाची उधळण आणि फटाक्यांची आतषबाजी करत जल्लोष केला. या अनपेक्षित आणि चुरशीच्या निकालामुळे गावातील राजकीय वातावरणात उत्साह संचारला.
७५ वर्षांनंतर मराठा समाजाला प्रतिनिधित्व
वाघोदा बुद्रुक ग्रामपंचायतीच्या स्थापनेपासून तब्बल ७५ वर्षांनंतर प्रथमच मराठा समाजाला उपसरपंचपद मिळाल्याने महेंद्र काळे यांच्या विजयाला विशेष ऐतिहासिक महत्त्व प्राप्त झाले आहे. या निवडीमुळे गावातील सामाजिक प्रतिनिधित्वाच्या दृष्टीने नवा अध्याय सुरू झाल्याची भावना ग्रामस्थांमध्ये व्यक्त होत आहे.
नवनियुक्त उपसरपंच महेंद्र काळे यांच्यावर सर्व स्तरांतून अभिनंदनाचा वर्षाव होत असून, गावाच्या सर्वांगीण विकासासाठी आपण कटिबद्ध राहू आणि ग्रामस्थांच्या विश्वासाला पात्र ठरू, अशी ग्वाही त्यांनी याप्रसंगी दिली.
