पाचोरा (प्रतिनिधी, जन सम्राट टाइम्स) : पाचोरा शहरात भारतरत्न डॉ. बाबासाहेब आंबेडकर यांच्या १३५ व्या जयंतीनिमित्त १४ एप्रिल २०२६ रोजी ‘ड्राय डे’ घोषित करून शहरातील तसेच गाव, तांडा आणि वस्त्यांमधील सर्व मद्य, दारू व वाईन शॉपची दुकाने पूर्णपणे बंद ठेवावीत, अशी मागणी करण्यात आली आहे. या संदर्भात राष्ट्रीय भीमसेनीच्या वतीने पाचोरा पोलीस ठाण्याचे पोलीस निरीक्षक यांना निवेदन देण्यात आले.
या निवेदनात नमूद करण्यात आले आहे की, डॉ. बाबासाहेब आंबेडकर जयंती मोठ्या उत्साहात आणि शिस्तबद्ध वातावरणात साजरी केली जाते. शहरासह ग्रामीण भागातही मोठ्या प्रमाणावर मिरवणुका, सांस्कृतिक कार्यक्रम आणि विविध उपक्रमांचे आयोजन केले जाते. अशा वेळी मद्यविक्रीमुळे अनुचित प्रकार घडण्याची शक्यता नाकारता येत नाही. त्यामुळे कायदा व सुव्यवस्था अबाधित राहण्यासाठी १४ एप्रिल रोजी संपूर्ण परिसरात मद्यविक्रीवर बंदी घालण्यात यावी.
तसेच, जयंती उत्सव शांततापूर्ण, आनंददायी आणि सामाजिक सलोखा राखणाऱ्या वातावरणात पार पडावा, यासाठी प्रशासनाने योग्य ती उपाययोजना करावी, असेही या निवेदनात नमूद करण्यात आले आहे. ‘ड्राय डे’ जाहीर केल्यास नागरिकांना जयंती साजरी करताना कोणताही अडथळा येणार नाही, तसेच शहरातील शांतता आणि सुव्यवस्था कायम राखण्यास मदत होईल, असा विश्वास व्यक्त करण्यात आला.
यावेळी राष्ट्रीय भीमसेनीचे जिल्हाध्यक्ष यांच्या नेतृत्वाखाली हे निवेदन सादर करण्यात आले. या प्रसंगी माजी नगरसेवक खंडू सोनवणे, जयंती उत्सव समितीचे अध्यक्ष रवि वाघ, सुपडू जाधव, वंचित बहुजन आघाडीचे तालुका अध्यक्ष संदीप जाधव, मिलिंद खैरनार, संजय खैरनार, भीमराव जाधव, दीपक जाधव आदी उपस्थित होते.
दरम्यान, पोलीस प्रशासनाने निवेदन स्वीकारून याबाबत सकारात्मक भूमिका घेत योग्य निर्णय घेण्याचे संकेत दिल्याची माहिती समोर आली आहे. त्यामुळे पाचोरा शहरात यंदाची आंबेडकर जयंती शांततेत आणि उत्साहपूर्ण वातावरणात पार पडेल, अशी अपेक्षा व्यक्त केली जात आहे.
